房祖名（左）同Fiona （箭嘴示）前晚喺中環一棟唐樓拍戲，其中Fiona 喺片中仲要猛煲煙。
祖名喺空檔時同工作人員有說有笑。
Fiona 大讚緋聞男友房祖名成熟咗，但就強調彼此只係好朋友。
薛凱琪（Fiona ）同房祖名呢對緋聞情侶，前晚一齊到中環必列者士街一棟唐樓拍攝電影《Break Up Club 》。馮仁昭見到記者走到對面樓嘅天台影相，見到Fiona 同祖名兩個坐喺梳化度，其間導演黃真真不時走到祖名面前指導佢做戲。
唔知呢對緋聞情侶係咪知道有記者，唔使埋位時好少傾偈。大約10 分鐘後，工作人員發現有記者影相就即時拉埋窗簾，又用Laser 燈照鏡頭阻止拍攝，最後仲趕晒記者落樓㖭。
角色性格憂鬱
Fiona 拍戲時嘅造型同平時好唔同，變得不修邊幅，平日乖乖女嘅佢因為劇情要求要全程煙駁煙。見佢食煙手勢都相當熟練，不時吐出陣陣煙圈，唔知真係以為佢係個資深煙民。可能Fiona 喺戲入面嘅性格比較沉鬱，見佢不時低頭沉思，一啲笑容都冇，同佢平時事無大小都哈哈大笑好唔同。
另外，Fiona 噚日到商台宣傳新歌《叮叮車》，首歌係講一個女仔等待一個男仔，問佢係咪等緊祖名表白？Fiona 好大反應咁話：「唔係呀，講咗好耐啦，我哋係好朋友，唔好成日迫我埋牆角。」不過，Fiona 大讚祖名成熟咗，拍戲時大家好有默契，而且佢仲用平時同男友相處嘅方式同片中嘅男友祖名談情。
