台灣有個怪現象，就係愈紅愈要剝，早排楊謹華大晒C 奶拍胸圍廣告，因為有《敗犬女王》人氣加持，代言價高見500 萬台幣（約120 萬港元）。
台灣偶像劇《敗犬女王》仲有兩集大結局，雖然有觀眾投訴尾段劇情拖泥帶水，但平均收視依然徘徊6.59 ，即係有300 萬人次收睇。
由楊謹華飾演嘅女主角「單無雙」，最終回究竟情歸「小草莓」阮經天，抑或「學長」溫昇豪，成為劇迷熱話之外，憑《敗犬》人氣大反彈嘅楊謹華，近排就有網民實牙實齒指佢早年「經營副業」，陪瞓一晚收40 萬台幣，折合港幣10 萬有找。
楊謹華戲中飾演事業能幹，但無愛情滋潤嘅「單無雙」，於是情挑阮經天玩一夜情。不過現實中嘅楊謹華，最近被爆「經營副業」，陪老細瞓一晚要40 萬台幣。
敗犬女王情歸何處近日成為劇迷熱話，無論係「小草莓」阮經天，抑或「學長」溫昇豪（圖左），同樣各有支持者。據聞，最終單無雙會同學長有情人終成眷屬，但因為俾人踢爆劇情，令大結局去向存在變數。
千萬進賬
多得《敗犬》效應，令即將踏入三十二歲嘅楊謹華，終於上到位做一姐，廣告、活動排山倒海，呢大半年唔經唔覺賺咗1,550 萬台幣（約360 萬港元）。
自爆一年冇拍拖，楊謹華話最緊要荷包大豐收，男人嘅滋潤根本微不足道。但近日台灣一個討論區，就有網友語帶雙關暗示楊謹華曾經「經營副業」。
「當紅的敗犬女王與F4 朱笑（孝）天交往過，當時二人分手是因為發現敗犬有在陪睡覺，一個晚上40 萬台幣。」
默認短命戀
○一年由model 轉行拍劇嘅楊謹華，處女作就有機會同F4 嘅仔仔周渝民以及朱孝天合作，最後仲同朱孝天傳緋聞。
想當年F4 紅透東南亞，楊謹華只係人氣普通嘅小model ，兩個拍拖都只能偷偷摸摸。對於呢段只維持四個月嘅短命戀，楊謹華直至今年初才透過專訪默認。
對比番網友嘅指控，楊謹華即係一入行就秘撈，不過收40 萬台幣瞓一晚，似乎人氣同市價唔多合比例。
被人話做過「陪瞓女王」，楊謹華經理人柴曉倩當場無名火起：「無聊！我們不想回應。」
《敗犬》其中一個結局，講「單無雙」唔嫁「學長」要做走佬新娘，赤腳狂奔去搵「小草莓」。導演為加強效果，安排楊謹華到台北及台中嘅地標喪跑，包括忠孝東路與敦化路交界，仲有台中嘅霧社，總之拍到邊就跑到邊，件婚紗長期放响外景車上備用。
鍾情嫩男
《敗犬》進入大結局最後倒數，究竟楊謹華飾演嘅「單無雙」情歸何處，劇迷意向未有一面倒，阮經天同溫昇豪各有支持者，據聞電影台已經做好兩手準備，拍定兩個happy ending ，同時靜觀外界反應，再決定「單無雙」嘅真命天子。
大半年來日夕相對，兩位男主角阮經天、溫昇豪聲稱抽離唔到角色，不自覺已經愛上敗犬女王。但現實中嘅楊謹華，對兩位男士似乎興趣不大，反而早排俾人發現與同劇嫩口男星懷秋，秘密歎麻辣火鍋。
對於傳出曖昧關係，楊謹華例牌否認：「同行還有兩個化妝師，那天是化妝師約他（懷秋），曖昧應該是他們吧！」
快32 歲嘅楊謹華，同現年27 歲嘅懷秋（黑衫）食麻辣火鍋，表現完全冇代溝，發展姊弟戀應該無問題。
爆粗學長
楊謹華謝絕緋聞埋身，但飾演「學長」嘅溫昇豪，就口口聲聲話「入戲太深」，早前仲响私家blog 寫咗三封情信俾「單無雙」，以「遇見妳大概就是生命中最美麗的故事」、「我們前世是對淒美鴛鴦」句句肉麻當有趣，製造緋聞煙幕。
同楊謹華情況差唔多，捱足十年終於有得紅嘅溫昇豪，健碩身形配合劇中角色多情多金又呵護女人，加上自爆無女朋友，溫昇豪馬上成為OL 眼中理想情人，人氣絕不輸蝕阮經天。
不過望落文質彬彬嘅溫昇豪，真人原來好火爆。早兩個禮拜，有記者見到佢同女經理人坐响咖啡室傾公事，點知傾唔夠一陣就鬧交，溫昇豪拋下一句「他×的」就轉身走人。
許瑋甯媽咪
同許瑋甯拍拖兩年，阮經天跟得男友性格出晒嚟，除咗耐不耐秘密外遊拍拖；平日拍劇早收工，又會趁機會食飯撐枱腳，對於愛女搵到如意郎，許瑋甯媽咪只係希望佢哋感情穩定，未心急想飲女婿茶。
報稱單身嘅溫昇豪，經常有意無意透露自己愛上楊謹華，借緋聞再谷一谷人氣。
同經理人鬧完交，溫昇豪半夜三更揸車會合長髮姑娘，利用車內僅有空間，發揮無比嘅激情，歷時一個鐘。
車震實錄
一肚火嘅溫昇豪，之後揸車去到台北縣蘆洲一棟住宅，接走一位頭髮長長嘅女子離開，再到附近陰暗處將車停低。
溫昇豪對住長髮女子，將剛才嘅怒火轉化成慾火，兩人開始响車廂擁抱、摸面繼而激吻，上演火辣
車震。
