憑處女作《赤壁》角逐今屆香港電影金像獎「最佳新演員」的Chiling 林志玲，明知勝算唔及《長江7 號》的徐嬌，仍抱着參與的態度，決定出席金像獎，仲答應大會做埋頒獎嘉賓。
要襯得到台灣第一名模，大會的確想得周到，安排「城嫂」熊黛林，與Chiling 孖咇上台頒獎。兩大美女同台原本夠晒睇頭，可惜同行如敵國，即使Chiling 近年棄模從影，但為免與「地頭蟲」熊黛林正面交鋒，她竟選擇臨時縮沙。
離遠睇，林志玲看似風采依然，當近距離望真啲，雙目無神面色青白，粉頸再出現敏感紅斑，一句到尾，殘！
入到場，林志玲見到電影公司老闆林建岳，爭取機會跟對方握手打招呼，旁為任賢齊。
放馬過嚟！（設計對白）
當晚以全黑Dior 晚裝現身的熊黛林，雖然被風吹起裙腳有點狼狽，但依然贏晒。
另一套晚裝，低胸程度接近危險邊緣，林志玲同佢的確無得鬥。
黃百鳴臨時頂替林志玲，出場時爆肚說：「美女與俊男嘅配搭」令熊黛林唔識反應。
疑似走光
身高只有五呎九吋的Chiling ，與近六呎高標準模特兒體態的熊黛林同台過招，高下立見，臨時甩底，更令大會陣腳大亂，無計可施之下，工作人員曾拍膊頭搵身形高大的任達華補位，但開騷前夕，又改由黃百鳴以《葉問》之友拍住熊黛林上陣，一同頒發「最佳美術指導」和「最佳服裝造型設計」兩個獎。
身高唔夠人鬥，連日在寧夏趕拍《刺陵》的Chiling ，疲態盡現，穿上Marchesa 金色露肩晚裝行紅地毯，被追問與緋聞男友邱士楷婚訊時，即使她主動行埋記者身邊低晒「咪咪」，但雙眼無神，就算濃妝下仍見又乾又皺，有失「第一名模」美譽。
相反，無份提名的熊黛林，心情輕鬆挽住導演葉偉信和老闆黃百鳴現身，由於當晚吹起大風，熊黛林不時要低身整理黑色Dior 低胸晚裝，因為動作過大，被懷疑露點走光。之後她再換上另一條超低胸Dior 長裙上台頒獎，完全挑戰走光極限。
猛虎不及地頭蟲，熊黛林搶鏡指數由頭帶到尾，Chiling 縮沙，不無道理。
林志玲
熊黛林
一級名模
林志玲（34 歲）
身高：5 呎9 吋
騷價：20 萬或以上
台灣模界一姐林志玲憑着玲瓏身材，接拍瘦身廣告一炮而紅，曾先後擔任多個綜藝節目主持，05 年於內地拍廣告墮馬受傷，一度傳她毀容，中港台大事報導，令她人氣更盛。與台灣富商邱士楷傳出婚訊的她，08 年進軍影壇，接拍電影《赤壁》，事業更上一層樓。
熊黛林（27 歲）
身高：5 呎11 吋
騷價：8-15 萬
熊黛林曾奪「中國十大模特兒」，05 年進軍香港市場，赤裸抱胸接拍收身廣告。其後與郭富城因拍MV 撻着，成為「天王嫂」後，身價不斷颷升。去年，夥拍甄子丹參演電影《葉問》，演技大受好評，令她於中港台三地名氣大增。
