大合照時，羅凱珊同周秀娜面左左，搞到梁嘉琪（左一）同周柏豪（右一）鬼咁尷尬。
女藝人博出位，又唔想露肉嘅，一哭二鬧差唔多係百發百中嘅必殺技。
近月同Angelababy 鬥到火紅火綠嘅Kama （羅凱珊），喺輸咗半個馬位嘅情況下，終於出招。上周五（10 日），佢喺屯門廣場行騷，之後記者問佢同Angelababy 嘅關係時，佢忽然揞住塊面喊，但就喊極都冇眼淚喎！跟住唔夠半分鐘，佢又極速回復笑臉，同記者繼續做訪問。
一聽到「Angelababy 」個名，羅凱珊即時掩面喊，但完全冇眼淚。
唔使半分鐘後，佢又若無其事笑住俾記者任影。
俾記者冷落嘅周秀娜，忍唔住暗嘲羅凱珊多是非。
