3/4
05年憑電視劇《至尊紅顏武媚娘》响香港愈來愈多fans 嘅賈靜雯，兒童節前夕開記者會哭訴丈夫帶走囡囡「梧桐妹」失蹤四個月，順便自爆婚姻一早出現問題，原因係丈夫同老爺奶奶唔理解佢嘅演藝工作，搞到家無寧日。
孫家不斷有聲音指控賈靜雯只顧拍劇唔理個女，搞到身為父親嘅孫志浩無論幾忙都好，一放工就仆返屋企湊女，親戚朋友都笑佢係「超級大奶爸」。
孫家响上海有頭有面，知道個仔要娶台灣緋聞女王返屋企，一度驚佢俾人屈食死貓，後來經過同個女驗DNA ，奶奶先肯俾賈靜雯入門。圖右起：孫父孫文騏、孫母劉曙光、賈靜雯。
喊到失聲
現年34 歲嘅賈靜雯，指丈夫孫志浩四個月前帶埋父母，到佢上海家中，以父女到美國探親為由，強行帶走四歲女兒「梧桐妹」，從此下落不明。「我不知道他們在哪？我好想女兒，拜託大家幫我找！」
至於「爭女風波」導火線，賈靜雯自爆因為有廣告商搵佢同囡囡一齊拍廣告，為咗留個紀念於是一口答應，點知夫家上下認為佢當個女係「搖錢樹」，於是雙方發生衝突。
孫家一直不滿賈靜雯唔肯安安分分留喺屋企做少奶奶，更多次帶埋「梧桐妹」上電視，早排仲簽約楊紫瓊旗下嘅經理人公司，過分高調，賈靜雯被夫家指太愛出風頭。
黃磊、大S
05年賈靜雯大住個肚仲想拍電視劇《夜半歌聲》，事關男主角係同佢傳過緋聞嘅黃磊。後來孫家俾500 萬台幣叫佢唔好拍，女主角位最後由賈靜雯好姊妹、近日响blog 中支持佢要爭取母女重逢嘅大S 徐熙媛頂替。
孫志浩舅父劉正中向傳媒發表六項重要聲明，其中一項暗示賈靜雯拍劇期間同黃磊偷情，幾日之後，孫家司機亦無端端同記者爆料，指名道姓話賈、黃孤男寡女同房身有屎，唔肯開門見人。
舅父爆料
講到自己冇使過孫家一分一毫，但孫志浩嘅舅父劉正中，日前代孫家發聲明還擊，直指賈靜雯大話連篇。
佢話當年賈靜雯懷孕期間以500 萬台幣接下電視劇《夜半歌聲》，老爺奶奶唔想新抱辛苦，於是自己攞500 萬送俾賈靜雯叫佢唔好拍，之後賈靜雯話供樓壓力大，孫志浩05 年1 月起每月俾10 萬家用，直到06 年8 月兩公婆鬧大交，孫停俾家用，賈靜雯呢段期間穩袋百幾萬。
之後劉正中開始玩踢爆，指06 年賈靜雯响南京拍劇「發生了不堪的事」，暗示孫家新抱「紅杏出牆」。對照番當年嘅新聞，賈靜雯06 年身處南京拍電視劇《悲傷時唱首歌》期間，的確同內地小生黃磊傳過緋聞。
至於孫志浩抱女失蹤，劉正中話賈靜雯同樣有前科，指佢曾經帶兩個人到上海家中，綁起保母繼而帶走囡囡，公安曾上門調查。
05 年
賈靜雯婚前婚後緋聞一樣多，佢老公孫志浩亦經常俾人影到身邊出現妙齡辣妹，各有各玩。
08 年
剛宣布離婚嘅伊能靜，以前同賈靜雯係好姊妹，但四年前伊能靜衰多口向外評論佢嘅婚姻，兩人因此反面。其實賈、伊真係好夾，除咗先後同黃磊傳緋聞，兩個亦傳過同華誼兄弟老闆王中磊有親密關係，所以俾人笑呢兩男兩女組合叫做「雙磊電雙靜」。
隔空反駁
舅父句句有骨，孫家嘅多年世交、台灣藝人周丹薇亦撲出嚟踩多腳，強調賈靜雯婚後只花五分之一時間照顧家庭同女兒，連佢囡囡都成日問點解媽咪陪佢瞓一陣覺覺豬就要去講電話，仲話孫志浩一早通知佢會同個女去美國，唔明點解賈靜雯要講大話。
周丹薇知道06 年8 月賈靜雯抱走「梧桐妹」返台灣半年件事，直到孫志浩簽下協議書，賈靜雯先肯帶個女返上海，至於協議書內容，周丹薇只肯講：「是對女方有利內容。」
對於所有指控，賈靜雯只肯透過律師回應，強調大肚期間攞過120萬家用，之後復出拍劇馬上還錢，至於舅父口中嘅「不堪的事」，賈靜雯冇正面回應，只係話當時為咗保護個女，响半威脅之下寫悔過書。
上海
賈靜雯強調，婚後拍劇係因為要搵錢供台北信義區嘅豪宅，至於佢名下、由孫家俾錢供嘅兩棟上海湯臣獨立屋，賈靜雯話阿媽住緊嗰間係佢俾錢買，反駁離婚要孫家送樓之說。
台北
