JJ 話3 年前來港受唔住購物天堂的誘惑，買了很多衫、鞋、雜物，但後來覺得搵錢唔容易，衫多到要送畀朋友，於是改掉壞習慣，變成慳妹一名。
港女話題最近hit 爆全城，港女代表「黎三萬」被全城恥笑，就連「港男」插爆港女惡行的「89 宗罪」都被網民熱煲。港女惹火，就連3 年前由濟南來港掘金的賈曉晨（JJ ）亦對港女踩多兩腳，藐爆港女貪錢又乜都靠男人，成日被人話發姣冧電車男嘅佢更狠批港女：「最憎人發姣！」
最近買埋樓叠埋心水長駐香港嘅JJ，又以行動證明自己冇俾港女同化。死慳死抵的JJ ，終於儲夠錢畀首期，以192萬買入將軍澳怡心園一個780 呎單位。上週四（26 日）搬入新屋包辦清潔仲擔擔抬抬，就連上手業主留低的家具裝修亦一律通殺，慳得一蚊得一蚊。頂爛市到咁，小心成港女公敵。
3 萬蚊港女黎潔瑩嫌棄追求者搵唔到錢，樣樣以錢為先，就最令JJ 反感。
「朋友話我愈嚟愈似香港人，我都驚變咗港女呀！」JJ 賈曉晨有留意勁hit 的港女話題，睇完網友訂立的「港女89 宗罪」之後，對港女「成日發姣」、「覺得大陸人都係雞」、「咩都要男人畀錢」等惡行極之反感，向本刊記者力數港女不是：「我最憎人發姣，亦最憎人話我發姣！」；「中國13 億人都係雞？咁多雞好難養㗎喎。」
自己嚟 JJ 賈曉晨上週四（26 日）搬離03 年底租的舊住所清水灣道8 號，雖然身邊有公司男同事幫手，但JJ 堅持自己落手搬，絕對唔靠男人。
自己搬琴 原來JJ 自小就識彈琴，她小心翼翼地將舊屋搬來的電子鋼琴擺在睡房。
搬到身水身汗，但JJ 仍趁搬運工人一離開，就自己拎起個地拖拖地抹窗吸塵，頭髮亂晒都好少理。
JJ 同媽咪兩個人住780 呎單位，雜物唔算多，衣物佔一半。JJ 話：「其實我好少買衫，通常左襯右襯着幾次；名牌更少，為咗出event 先會買。」
娘爆組合 業主留下的組合櫃和少量傢俬，JJ 打算留為己用唔浪費。自己則另外買了床、梳化、吊燈、抽濕機等約1 萬元。
騎呢月亮 上手業主在主人房冷氣機旁睡床上方畫了一個月亮圖案，JJ 唔覺騎呢：「幾靚吖，唔會油咗去。」驚嘥錢至真啩。
死慳濟南妹
港女成日被批評貪慕虛榮又奉旨使男人錢，但由鄉下濟南來港3 年的JJ 就好慳家，除了唔買名牌，就連食飯盒都要計過數。JJ 笑笑口話：「收工奉旨即刻返屋企唔去shopping ；我唔會買名牌，亦唔亂買衫；我幾乎日日都係公司（經理人）畀錢我買飯盒食，如果唔係開緊工，冇公司津貼，我只會食麵包；最花錢嘅化妝品又有化妝品牌贊助。」不單咁，連上手業主剩下的組合櫃、衣櫃、裝修、電器都照單全收，上星期四搬屋，搬運公司多收佢2 百蚊都即刻打去搬運公司詐型，「講好咁多就咁多，收多咗喎。」
JJ 說初入行已想買樓置業，但一定唔靠男人泵水。選將軍澳區因為交通方便，又近電視城，工作就腳啲。
供足30 年
死慳死抵，所以JJ 來港3 年就儲夠錢畀首期買樓，今年年初，她趁樓市低迷，便以192 萬講入將軍澳寶琳站怡心園一個七百多呎三房單位。
雖然新屋「立立亂」，但上週四JJ 仍邀請記者參觀新居。新居的主人房約百多呎，有獨立廁所，卻只夠放單人床；客房則有上手留低的黑色衣櫃及地櫃，連床都冇。「公司唔畀拍拖，單人床夠啦；客房留畀媽咪，佢話瞓榻榻米就得，仲有一間房係衣帽間。」JJ 身為至少5 個品牌的代言人，包括Missha 化妝品、Sony 、Tony&Guy 髮型用品及網遊魔域等，加上拍電影拍劇廣告，她說去年都賺到一百萬，不過今次做業主，她仍堅持攤盡，做30 年按揭：「留番啲錢至有安全感，之前租清水灣8 號，6 百幾呎要1 萬2 千蚊，家780 呎每月只係供7 、8 千，已經好抵！」咁識精打細算，絕對有港女味，不過係港女嘅優點囉。
唯一貴嘢
JJ 為慳錢，所以一屋舊傢俬，上週二（24 日），JJ 去到觀塘傢俬倉揀梳化，睇中這套6,000 元座地大梳化，但size 太大要訂做。JJ 指這件已是新居中最貴的東西，她的經理人文滌則透露會送給JJ 賀她入伙，又慳一筆。
港女89 宗罪節錄
反港女宣言
JJ 對港女成日發姣及侮辱內地人的惡行最睇唔過眼！
我最憎人發姣，亦最憎人話我發姣！
中國13 億人都係雞？咁多雞好難養㗎喎。
將軍澳星星街坊
JJ 揀將軍澳區置業，因為交通方便又近電視城，事實上好多明星藝人都住將軍澳或者買樓放租，由調景嶺至寶琳分布全區，行出行入隨時有明星睇！
