因為三隻肥B 才剛開眼，同埋啱啱出咗兩隻牙仔，未有力行，還停留在爬吓爬吓的階段，所以，絕對係任人魚肉，幾好影呀！
從前，咱們罵人，總愛拿狗來作比喻。「衰過狗」、「乜你咁狗」。鬧完，仲要踩多兩腳，可想而知，狗幾咁賤。但，到底是時代不同了。當夕爺的歌詞，都要緊貼世情潮流進化，填上「做隻貓做隻狗不做情人」，為形象衰到貼地的狗，套上光環重新詮釋，可想而知，今時今日做狗，地位崇高幾咁happy 。
尤其個樣生得趣致，如這班出生剛滿十四日、才剛開眼看世界的哥姬肥B ，都未戒奶，已經成棚人爭住錫，契爺契媽一大堆，唔係食飽屙瞓，就係瞓飽屙食，天跌落嚟？玩咗先算！其實，庸碌人生過眼雲煙，真義，何嘗不是！
「Pink Pink 」一家四口
其實狗B 同人B 都無分別，食飽奶瞓，瞓飽覺玩，但勝在唔會雷公咁大聲喊。
育嬰指南
都說母愛偉大。
頭一趟初為人母的哥姬犬「Pink Pink 」，大抵知道世道艱難，奶粉錢唔易賺，身懷三胞胎一仔兩女，於懷孕期間（55-65 天），堅持跟住主人輝哥，由土瓜灣坐私家砵砵車到將軍澳廣場「寵物寶寶」寵物店，快快樂樂去上班，示範服從動作，兼任駐場紅牌公關。「佢生得嗰日，陣痛緊都仲照樣開工，搞到啲fans 不知幾緊張。」上月12 號晚，「Pink Pink 」就在輝哥老早準備好的紙皮箱＋乾淨大毛巾鋪低的舒適產房內，由半夜五點零開始，生生生到第朝十一點幾，全體自然分娩。「係大女出世嗰吓，『Pink Pink 』無經驗唔識用力，要我客串助產士，幫手掹一掹。」好在「Pink Pink 」母性夠，肯自己湊B ，「否則我仲要做埋代母，撕胎盤剪臍帶抹身每兩粒鐘餵狗B 一次奶，唔使瞓都似！」為加強狗媽媽母乳，還特製重量級坐月餐單：狗糧、奶粉、鈣片溝魚肉。「如果一胎多隻，或狗媽媽太瘦唔夠奶，都可以好似人咁，用木瓜煲魚，將湯攤凍俾狗媽媽當水飲，湯渣更加唔好嘥，攞嚟分幾餐溝狗糧俾狗媽媽補身，咁做法對於狗媽媽短時間內恢復體力，特別有效。」嘩堂堂六呎男，口吻拍得住職業坐月呀吓。
哥姬威威
全名威爾斯哥姬犬Welsh Corgi ，原產地英國，出晒名係英國王室寵物犬。樣子有幾分似狐狸，但無咁狡猾，而且偏烚。特長大嘴巴笑起上嚟拉闊程度勁過麥當勞叔叔，呈deep V 形，仲要經常笑到見牙唔見眼，在日本亦深受歡迎，長踞最受歡迎犬種top 5 位置，被喻為「擁有天使般令人忘憂的smiling face 」，日日對住，好過啪藥減壓。
頭形：雙眼圓杏，上下眼線粗黑，似畫咗smoking eyes 咁。額高嘴長頭骨大，粗到，似無頸，幾乎同身形成一直線。
體形：身長腳短，胸厚背平，加上毛短，又無尾，更凸顯周身肥肉，行路肚腩貼地，大屁股左搖右擺扭動強勁，高空俯瞰更倍添震撼視效！
身高：25-30cm 體重：10-15kg
