雖然時值金融海嘯，余文樂逆市變搶手貨，一周內連接三個廣告，不過鏡頭背後要忍受冷水淋頭、犧牲色相及冇啖好食，難怪他直言賺辛苦錢。
阿樂早前飛抵北京為羅志良新片開工，期間特意向劇組請假一星期搵真銀，為代言的三個品牌拍攝廣告片。今次阿樂同時被飲品、護膚品及相機「包下」，每個廣告均賺七位數，金融海嘯下身價可謂羨煞旁人，不過他卻無奈表示：「拍得好辛苦，好似個護膚品廣告咁，喺上海開工氣溫低，佢哋安排我畀冷水照頭淋，之後仲要擺個瀟灑甫士。實情係我已經凍到冇晒感覺，期間仲要赤裸上身，真係知覺全無。」
北京捱石頭飯盒
不過由於北京拍戲期間只能捱飯盒關係，阿樂「感恩」表示甫飛抵上海，連行李也不放下，即驅車往吃自己最愛的醉蝦，實行開工前大快朵頤：「我唔係扮高檔，只係之前『被困』喺郊區拍戲，啲飯盒送到嚟，等到我可以放飯，都已經硬到好似石頭一樣，期間我又哮喘復發，見到有好嘢仲唔食番夠本！」
拍鬼片多咗個人
至於今次拍攝靈異電影，阿樂透露劇組有工作人員於主景的大宅，拍得一張「問題照片」：「我哋當時身處三樓，點知工作人員對住窗口影出去，竟然影到有人企咗喺出面，都咪話唔邪，嚇到在場啲女仔尖叫，我就膽粗粗叫佢攞張相嚟睇。（你唔信鬼神？）我信有呢啲嘢存在嘅，不過冇做壞事，佢哋係唔會搞你嘅。」
拍竣護膚品廣告後，阿樂飛返香港，繼續拍攝其他兩個廣告，其中一個更與李璨琛合作。能夠與好友工作中
舊，難怪阿樂指感覺很特別。
文﹕影視組
拍護膚品廣告時還要露點犧牲色相。
