Laughing 哥Reborn 倒數第2日謝天華近日憑《學警狙擊》中的警方卧底Laughing 哥一角人氣爆燈，而Laughing 哥將會在本周五大結局中翻生，更是全城關注。雖然無綫對Laughing 哥翻生一事保密，但殉職7日的他，昨日卻神秘現身灣仔警察總部，為《學警》進行補拍，令一班真警察大為雀躍，不停追問記者Laughing 哥是否真的翻生，當正Laughing 哥是偶像。
謝天華飾演的警方卧底Laughing 哥，在上周三播映的無綫劇集《學警狙擊》中英勇殉職，戲中角色終年35歲。昨日是Laughing 哥頭七，有網民繼續發起哀悼，而本周五播映的《學警》大結局中，Laughing 哥會否順應民意翻生也成為近日城中熱話，不少觀眾強烈要求無綫讓Laughing 哥翻生，也有人認為無綫不應扼殺編劇創作，夾硬安排Laughing 哥復活。
Laughing 哥在上周三播映的《學警狙擊》中，為完成任務而叫吳卓羲開槍殺他，壯烈犧牲。電視圖片
Laughing 哥昨午在灣仔警察總部為《學警狙擊》本周五播放的大結局補拍。
警察興奮「呢單先至係大嘢呀」
儘管《學警》監製黃偉聲大賣關子，對Laughing 哥生死一概保密，但據悉無綫已鐵定安排Laughing 哥在後晚播出的第30集大結局最尾部份神秘現身，一方面順應民意滿足一眾喜愛Laughing 哥的fans ，另一方面則玩神秘不作任何交代，讓觀眾有一個想像空間，更可留伏線以開拍第四輯《學警》。而飾演Laughing 哥的謝天華，昨日下午便現身灣仔軍器廠街警察總部，補拍《學警》大結局的翻生片段。昨午約2時，Laughing 哥由司機接載抵達灣仔警察總部，並獲准由警務人員專用通道進入，認真巴閉。相反無綫攝製隊由正門入內進行拍攝時，疑因溝通問題，門外把守警員一度阻止攝製隊進入，擾攘近5分鐘後，無綫再經警察公共關係科通傳始能順利入內拍攝。Laughing 哥昨日在警察總部現身，吸引不少傳媒到場採訪，其間不少軍裝及便衣探員紛紛好奇追問記者「等邊個」及「有乜大嘢」，得知「Laughing 哥喺入面」時，他們均表現得非常興奮雀躍，更有多名警員追問記者Laughing 哥是否真的翻生，也有警員打趣說：「呢單先至係大嘢呀！」想不到Laughing 哥在真警察心目中也份量十足。謝天華在警察總部逗留近3小時後，再由司機接載離開，門外有幾名軍裝警員為他開路，而穿上灰色西裝襯黑T 恤、一身Laughing 哥打扮的謝天華，見記者拍照時只托腮沉思扮cool ，未有停車接受訪問。之後記者致電謝天華，問他是否到警察總部補拍結局時，他竟Laughing 哥上身說：「我嚟協助警方調查呀！」問到其妻Tina 表示生日獲天華送上驚喜，天華反問說：「吓？我都唔知嘅？等我問吓佢先，或者等我check 吓個銀行戶口，睇吓係咪咁驚喜先。」
謝天華拍外景期間踎街邊吹頭，懶理途人眼望望。
近日忙於拍劇的謝天華，前日在尖沙嘴拍攝《老公萬歲》外景時偷空到茶餐廳嘆茶唞唞。
學警聯誼周五飯局觀賞結局
據知謝天華昨日除補拍《學警》結局外，更特別拍了一段《學警》宣傳片，借Laughing 哥號召力全力催谷收視。而前晚《學警》收視再次攀升，平均收視33點，即約有210萬觀眾捧場。另外，《學警》一班演員本周五會相約飯局聯誼，順道一起欣賞大結局。採訪、攝影：娛樂突發組
話你知：網絡Laughing 潮
謝天華在劇集《學警狙擊》中，將警方卧底Laughing 哥演得入木三分，迅速竄紅網絡界，上周他「一死以謝天華」殉職一幕，更令他成為不少網民心目中的英雄人物，有網民設立「Laughing 哥悼念區」向這虛擬人物致祭，另有人提議無綫開拍《Laughing 哥前傳》。Laughing 一詞不但成為網絡潮語，也是港人茶餘飯後的話題，全民陷入一股「Laughing 熱」。這熱潮也激發起港人的創作情緒，除了一系列創意改圖乘勢出籠外，也有人設計了一件「I Love Laughing 」T 恤（圖）在網上兜售，可謂商機處處，問你Laughing 未？
專家話：電車男空虛尋慰藉
虛擬英雄Laughing 哥在進興人多勢眾，在互聯網同樣覆雨翻雲，facebook 的「Laughing 哥」群組成員逾13萬，另一群組「我哋跟Laughing 哥嘅！」也吸引了超過1,000名網民加入。次文化堂堂長、香港嶺南大學文化研究碩士彭志銘認為，這種現象除反映港人生活空虛、人玩我玩的心態外，無力感也是主因，他說：「家社會冇一個有代表性嘅人物，好多香港人覺得有無力感，政治上冇得參與，工作又唔開心，仲有金融海嘯，好需要一個人物畀佢哋代入。加上佢本來係奸角，但原來係卧底、係個好人，仲為正義而死，俾好多港男或者電車男代入身份認同，覺得原來我都係得嘅、我係有料到嘅，你哋只係睇到我其中一面啫。佢哋唔係覺得Laughing 哥係英雄，而係覺得自己係英雄。」至於女性同樣捧場，彭志銘認為她們也希望另一半或男性朋友是個強勢、英雄式的人物，既然現實中找不到，惟有寄情於Laughing 哥。
句句金：卧底傍身金句
做卧底冇幾句金句傍身，分分鐘俾人起底，招致殺生之禍，以下是Laughing 哥的精警金句。電腦化？我最叻嗰條靚淨係識用電腦上鹹網同賭波咋喎。上帝要你滅亡，必先令你瘋狂！臭新仔，過咗戒奶期未㗎？記住我個名，Laughing 哥。你唔記得我教過你乜嘢呀？無論對住乜嘢人，必要時你都要開槍。個天畀你行你先好行，個天唔畀你行，你郁都唔好郁呀！唔係我條底線set 得低，而係我做人根本冇底線。吹水又唔使畀錢。一日大佬一世大佬。打生打死得個吉，舒舒服服有金執。我唔打你我就唔叫Laughing ，我叫Crying 。人人得而鋸之。只要對我有利，我話知你係我老竇老母。資料來源：《學警狙擊》
Laughing 哥昨日在警察總部拍攝3小時後，由司機接載離開。
http://appledaily.atnext. ... art_id=12533319
