演「藥煲」多人識，即時有雜誌摷番佢同張繼聰拍拖嘅舊聞再煲，不過梁嘉琪話：「咁多年前嘅事，唔想再講啦！」
《學警狙擊》Laughing 哥（謝天華）上週三疑似香咗，facebook 有成十萬人為佢哀悼，Laughing 算死得光榮囉！
除咗Laughing 哥之外，EU 妹「藥煲」梁嘉琪日日喊住做戲冧掂陳鍵鋒之餘，更有人覺得佢楚楚可憐想照顧佢。查實「藥煲」梁嘉琪未過無綫之前，喺有線撈開主播兼節目《怪談》主持，起碼每個月有3 皮嘢穩定收入，如今去無綫捱6 千蚊底薪。藥煲仍然話：「只要有劇畀我拍，簽成世都制！」
6 千蚊都話一世效忠，家陣嫌4,000 蚊奀嗰班大學生，想點先？
由有線到無綫，捱咗5 年終於有劇拍。雖然冇Laughing 哥咁搶，不過喊得夠可憐都有人留意㗎！
年齡：27 歲
身高：164cm
體重：100 lbs
三圍：32 、23 、34
喺有線做咗4 年嘅梁嘉琪，07 年得到余詠珊（有線娛樂新聞台前總監）提攜入無綫，初時只係娛樂新聞台主播，最慘以前喺有線月入閒閒哋2 、3 萬，過到無綫就由6 千蚊做起，難怪「藥煲」自稱窮到家用都冇錢畀。
勁搏命
劇中同陳鍵鋒一對，可惜俊男同女人緣分淺，就算傳緋聞都冇人信，如果換咗係吳卓羲可信性就高啲，不過見佢打保齡都騎晒陳鍵鋒膊馬咁落力，係唔知堂堂梁sir陳鍵鋒俾女騎點諗啫！
王祖藍幫手
冇錢畀家用咁大件事，真正受害人梁媽媽梗係舉腳反對，梁嘉琪說：「我真係好想拍劇，我問過屋企人，阿媽叫我繼續留喺有線，起碼收入穩定，但係我老豆、細佬就支持我，細佬仲話幫我畀住家用先，真係好感動！」喺無綫捱咗成年，終於俾佢博到「藥煲」一角，據知情人士透露：「王祖藍好錫佢，一有機會就不停同啲高層呀監製呀推介梁嘉琪，仲有余詠珊同麥當傑（有線驕陽電影前製作總監）都有同樂易玲推薦，當初《學》劇開拍前，監製黃偉聲想搵新面孔演藥煲個角色，經理人部門初時揀咗幾個女仔俾監製揀嘅，後嚟監製覺得佢剪短頭髮之後似女警，唔似一般女仔咁柔弱，又話佢有演藝底，做戲唔會太差，所以畀咗個角色佢做囉！」
大恩人
梁嘉琪喺邱子田中學F.5 畢業前，已因玩話劇認識王祖藍，之後入咗演藝表演系，仲做埋同學，祖藍幫口唔奇，但聽監製黃偉聲講，拍《學》時羅敏莊呢位演藝師姐都問梁嘉琪做成點，睇嚟「藥煲」喺演藝同學堆入面人緣唔錯喎！
好有緣
04 年同江若琳一齊去面試《伙頭智多星》，問佢有冇覺得江若琳（左）個樣變咗好多，梁嘉琪話：「唔覺喎，我諗瘦咗啫！」吓？《蘋果日報》圖片
唔提張繼聰
雖然《學》劇入面「藥煲」角色討好，但之前梁嘉琪喺有線時俾公司話佢私自去面試寰宇劇《伙頭智多星》同江若琳爭飯食，加上佢同謝安琪老公張繼聰嘅舊情史，人未紅已經有成串新聞，藥煲話：「有線單嘢中間有好多誤會先會搞成咁，其實張繼聰已經係以前嘅事，我唔會再講。」係囉，家陣「藥煲」多人冧，以前嗰一大堆「誤會」，用完即棄啦，仲講咩？
李碧華都睇
梁嘉琪拍《學警》做「藥煲」，著名散文作家李碧華都有睇，仲喺《壹週刊》專欄「潑墨」入面話梁嘉琪「表情苦兮兮，延續《怪談》時的『被迫害感』。」原來李碧華都係你《怪談》fans 喎！
梁嘉琪孖住司徒法正（右）話做咗《怪談》咁耐，喊都完全係出於內心，不過佢話最好彩係未真正見過鬼，好矛盾！
「《怪談》好變態」
自從05 年被人話私自面試《伙頭智多星》後，梁嘉琪即時俾有線雪咗大半年，跟住調咗去《怪談》做外景人肉撞鬼員，跟住驅魔大師司徒法正去猛鬼法地，結果集集都見到佢嚇到面青青喊到收唔到口，之後例牌司徒師傅就會話：「唔得嘞，要快啲撤退，大家走啦！」成個撞鬼經歷就功德圓滿。
嘉琪憶述自己撞鬼經歷時話：「佢哋真係好變態，有次去南洋拍外景，有間屋係死過人嘅，班工作人員唔敢入，師傅（司徒法正）又話佢法力高，佢入去隻鬼唔出嚟喎！最後搞到我一個人入去囉！真係嚇死我呀！」嚇親吓啫，起碼連李碧華都睇過你表演啦！
