我哋一齊砌低佢！（設計對白）
睇吓點！（設計對白）
鄭經翰出山拉頭纜的「雄濤廣播」將於年底啟播，由去年開始，大班招兵買馬，拋銀彈搶港台、商台十大受歡迎DJ ，開台在即，揀蟀行動升級。
除了梁繼璋、麥潤壽落實埋班，跟俞琤反面，去年劈炮唔撈商台的蘇施黃，以及連續兩年成為最受歡迎節目《瘋SHOW 快活人》的梁思浩亦齊齊過檔，矢志成立最強電台的大班，誓要砌低仇家俞琤。
怕你呀！（設計對白）
君如唔聽話
○四年，跟商台揸弗人俞琤擘面離場的鄭經翰再戰廣播界，雖然撞正金融海嘯，依然無懼以本傷人。
「（商業）二台近排十點時段好唔掂，一個廣告都冇，仲要俾港台梁思浩嘅《瘋SHOW 快活人》打得好慘，連續兩年嗱埋最受歡迎第一位，俞琤好唔忿氣，覺得林海峰同森美阮小儀無理由會輸，所以早排特登搵吳君如商量，要將佢嘅《嘩嘩嘩打到嚟》搬上朝早，不過君如唔肯，佢而家唯有調森美阮小儀上陣，希望有番啲起色。」知情者說。
阿蘇唔做電台，改上電視做教煮嘢食節目《蘇Good 》，收視率爆燈，連帶人氣勁升，俞琤都算走寶。
梁思浩孭飛的節目成為最受歡迎第一位，江美儀亦間中客串做節目。（《蘋果日報》圖片）
傳聞因關咪時食煙被俞琤炒魷的杜汶澤，已答允在大班電台再開咪，至於在商台月薪二十多萬的吳君如，因跟俞琤感情深厚，未有倒戈。（《蘋果日報》圖片）
年薪三百萬
據知，一直未有間斷傾梁思浩過檔的大班，知道內部收聽報告後，落重手將招兵條件加碼至千五萬五年，年薪三百萬，尚未包括分紅，決意將最受歡迎節目搬到自己電台。
「大班份人好實際，知道咁嘅形勢就即刻加碼，開到千五萬五年俾梁思浩，同蘇施黃嘅條件一樣，係電台最高薪兩個，佢哋仲享有特權，有電台股份。其實搵阿蘇已經係剃俞琤眼眉，事關阿蘇唔響商台仲紅過以前，做電視台做到邊好到邊，大班今次係趁佢（俞琤）病嗱佢命。」知情者說。
「好姨」薛家燕有一定擁躉，大班亦有意羅致，不過近日患病休息的她，仍未回覆對方。
大班一直斟森美過檔，據知出到十萬蚊一個月，不過由俞琤一手帶大的他，依然未為所動。（《蘋果日報》圖片）
大班同梁思浩食飯密斟，離開鏞記後，二人依然雞啄唔斷講個不停。
歌手有錢收
為要有更多歌手撐場，大班打破傳統，歌手出席電台節目，一律有酬勞。
「而家啲歌手上電台做宣傳，不單冇錢收，仲要冧班DJ 開心，佢哋先肯幫手，都不知幾受氣，但大班就會俾番錢人哋，你話啲唱片公司係咪開心好多，所以佢開台，一定搵到歌手幫，而家冇一間電台係咁做，佢咁樣打亂章，以後電台一定會有改變。」知情者說。
早兩個禮拜（三月九日），中午一時半左右，大班跟梁思浩於中環鏞記飯店見面，二人逗留至三時許才離開。記者事後致電梁思浩求證千五萬過檔一事，他笑住回應：「冇嘢係冇可能嘅，
豐都可以跌落三十幾蚊啦，邊個估到呀。」至於蘇施黃亦談笑用兵，「佢（鄭經翰）一個仙都冇俾過我，如果真係有咁多錢，我請你食飯。」
