過年有成個月唔好鬧人，年尾鬧晒先！
灣仔海皮景...
乜驅使我去試吓都因為維港景色，咁就去試吓呢間海景意大利餐廳，個景原來係咁嘅，還可以，但向下望，立即玩完！
食物...
我時常話，如果一間餐廳一開始serve啲麵包就已經可以決定佢的生死！坐低睇見嗰籮麵包，十足我向下望那幅爛地咁爛。
第一度餸八爪魚沙律$178，吓！乜原來咁貴㗎?!還算好食，亦係全晚食得落肚的一碟嘢！
噩夢開始！
煎芝士。燶黑色的！又硬！但奇怪，食落口又有些燶味的苦，又有少少甜，問個頗好招呼和好笑容亦有禮貌的女侍應，佢話係用意大利杏仁麵包糠做crust，話知你乜嘢意大利麵包糠，咁芝士又冇芝士味，成嚿嘢淨係得個燶苦同甜，乜鬼嘢嚟㗎?!我完全冇complain，但鬼佬經理自己走埋嚟解釋一輪，係panfried，唔係炸㗎……我理鬼你點整，個問題係難食吖嗎！
Pizza。個皮又唔脆，好似塊餅乾咁，由面到底都咁難食，我寧可食Pizza Hut！可憐！
Pizza。個皮又唔脆，好似塊餅乾咁，由面到底都咁難食，我寧可食Pizza Hut！可憐！
意粉。Aglio e olio最普通簡單煮法，蒜、芫荽、少許辣椒、Olive oil炒意粉，根本冇可能錯，錯得去邊呢？嘩！鹹到阿媽都唔認得，另一碟海膽意粉，一上枱已聞到超腥味，難食之極，大家都食了一啖便棄權。好笑容的女子來收碟，我只輕輕地說：「鹹咗啲！不過唔使話畀你個經理聽……」我費事聽佢解釋一輪佢嘅理由，好似我仲要entertain佢！可惜，三分鐘後，我見到嘅唔係經理，係大廚！佢問啲意粉好鹹呀，跟住嘅說話就一定係畀「丁－」的原因！大廚話：「I have tasted the dish.The flavor is our standard flavor.Now if you want,I can make it especially for you without salt and oil」神經嘅，你嘅standard一定啱㗎？不要忘記你喺香港，我哋食嘢係比較淡口味，不太鹹，甜品亦不太甜，你又試吓去廣州食甜品，甜到牙都甩！就算係我特別食得淡而嫌你煮嘅鹹，而你亦願意煮過另一碟畀我，咁係咪可以唔使講話呢個係你嘅standard flavor呢?!咁即係我錯啦，咁唔忿氣，咪鬼煮過碟呀！咁唔識撈點喺香港搵食呀?!
Veal。因為實在好餓，食得落肚都食，其實都非常柴皮。半島酒店Chesa的veal差不多價錢，一天一地！
Pork Chop。朋友一切開，已經話唔熟。我立即話唔好話人哋煮唔熟呀，靚豬中間係應該pink pink哋先至好食！朋友笑，唔熟同pink我分得開，咁我再望吓，嘩！中間真係好似街市掛住啲豬肉咁生！係冇可能食的，發豬瘟！我們立即叫埋單，亦結束了我們的噩夢！三個胡混地都食了$1,406，一毫貼士都唔畀！各位，我從來都有嗰句講嗰句，呢間Giando千祈唔好嘥錢去，Terrible chef、terrible manager、terrible restaurant!!!
Giando
地址：灣仔龍景街1號分域碼頭海軍商場1樓
電話：2511 8912
蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。
