無綫一班小生花旦包括楊怡、陳豪、佘詩曼、胡杏兒、林峯、夏雨、米雪同蔡少芬等噚日喺尖沙嘴出席「壹電視大獎2009頒獎典禮」，大會請嚟古天樂做頒獎嘉賓，仲發生唔少插曲㖭。當古仔頒獎畀楊怡嗰陣，楊怡開咪讚古仔好靚仔，又扮小fans 要求擁抱。古仔之後喺台上同曾經合作過嘅監製梅小青開玩笑，當小青姐話：「古仔我都同你合作過。」古仔笑住彈開話：「吓，你都記得呀！得得得，你講得獎感受得喇。」
楊怡喺靚仔古天樂手上領獎外，仲要求送個抱抱。
陳豪果然好鍾意飲咖啡，喺活動度都要嘆番杯。
古仔想殲滅陳豪
（左起）米雪、蔡少芬同佘詩曼悉心打扮出席頒獎禮，各具美態。
講到離開電視圈10年，古仔話都想拍番電視劇：「我都想，不過都要過多兩年先有時間，如果可以合作，我想同陳豪合作，我覺得佢可塑性高，不如拍套機械人題材嘅劇集，陳豪做機械人，我就做殲滅佢嗰個！」陳豪聽到古仔想同佢合作，梗係開心，仲話自己似阿諾舒華辛力加，唔介意做機械人。每次米雪出現，大家自然問到尹志強嘅健康狀況，家英哥日前話尹佬講唔到嘢要靠寫字，米雪話：「之前佢喉嚨係唔舒服，所以先寫字，家好好多，仲有少少咳，多謝大家關心。」佢希望低調處理尹佬消息，會不會叫家英哥唔好講咁多？佢話：「咁又唔會，佢哋都好關心，成日打電話問候，大儍（成奎安）之前都有嚟探佢。」
馬國明同胡定欣呢對緋聞情侶一齊出現，仲大方坐埋合照。
鍾嘉欣身穿粉紅色露肩晚裝，份外奪目。
楊怡着上露肩短裙，再配襯埋名貴首飾，零舍明艷照人。
from
http://appledaily.atnext. ... art_id=12509359
