匯豐控股（005）上周公佈業績，純利勁跌七成，還一併宣佈要供股集資，每12股供5股，供股價為28元。娛樂圈有不少匯控擁躉，鄭裕玲與名模Jocelyn 明知這隻失靈大笨象股昨日收市價已跌至33元，貼近供股價，但她們仍然堅持會繼續持有兼供股，但賭王何鴻燊四姨太梁安琪和袁詠儀（靚靚）見勢色不對，當機立斷不再供股，投資有道的鄺美雲一早看淡匯豐，早已賣掉這隻股票，她認為這隻股票有可能跌至20元，勸喻市民不要輕易入市。 採訪：林妃、葉雪
--癡心相隨派--鄭裕玲：供股當溝貨
「而家唔諗唔睇，成日諗會令到心情唔好，好負面，其實金融風暴有另一面睇，可以多啲同家人朋友相處，多啲返屋企食飯，又環保，我見中環啲OL 都自己帶飯，以前經濟發達個個都買嘢使錢，回復最基本生活係好事。我暫時唔諗趁低吸納，問過專家贊唔贊成供股，個個都贊成，相信香港人好多都有買匯豐，係情意結，大笨象嘛，不過供唔供股好個人決定，自己都諗住供啦，收咗咁多年利息，當嗱番啲息出嚟，其一支持香港，其二平啲當溝淡啲，我乜嘢價位都有入吓，但好少，唔多。」
卓能主席趙世曾：28蚊會入貨
「我嘅立場好清晰，供唔供股要睇股價，如果股價跌到28蚊就喺個市度入貨，唔使供股，今日收市價33蚊同供股價仲有5蚊距離，同匯豐有多年來往，手頭上都仲有貨，係好耐之前入嘅，我會繼續支持，至於損失多少冇得計，一日未賣一日都未計數，股市梗係有上有落。」
翻版關之琳Jocelyn Luko ：買屋要押後
「我老公都有投資匯豐股票，兩年前以高價買入，本來想賺到錢之後喺夏威夷買屋用嘅，點知到而家跌咗咁多，買屋計劃要押後，老公會繼續供股，打算用低價買入，希望博佢升番，其實呢一年股票跌咗咁多我老公都好唔開心，所以我哋努力接多啲騷，賺番之前嘅損失。」
曾華倩：迷戀情不變
入市價逾 $100
「我對匯豐有信心，終有日會升番，時間長短問題啫，當以前啲息嘔凸出嚟，以前收息咁開心，當先甜後苦，我冇正式統計過賺、蝕幾多，因為比起大戶我都係芝麻綠豆，我決定會供股，呢方面最緊要量力而為，唔好借錢嚟供，有多餘錢身為香港人都應該支持，有能力要刺激吓香港經濟，唔想見到香港咁多舖頭執笠，有人失業。我啲匯豐100蚊以上買入，持有咗好耐，諗住養老㗎，睇長遠啲唔好睇一時，我對呢隻獅子仲係好迷戀，亦對香港有信心，因為一出道開戶已經係匯豐，呢生人都只係買咗呢一隻股票。」
陳偉霆：供股博翻身
「我都有部份錢買咗匯豐股票，係喺高位時買嘅，當時人哋話一買就有賺，我咪羊群心理又買埋一份，我一定會繼續供股。」
--心灰意冷派--袁詠儀：揸股唔供股
入市價約 $100
「香港人對匯豐係有好深情意結，個個都諗住買匯豐嚟養老，邊會諗到匯豐會跌到得番33元呀！我喺100蚊樓上同樓下都分批買入咗呢隻股，喺50元又買入溝貨，買吓買吓揸住差唔多1萬股啦！原本都諗住供股，但而家跌到接近供股價，仲供嚟做乜，所以都係唔供啦！不過手頭上嘅匯豐我又唔會放，因為我對呢隻股嘅長線發展始終有信心。」
四姨太梁安琪：睇定啲至算
資料圖片
「跌到33蚊，唔係呀嘛？啲人掟貨啊？我手頭上嘅貨唔係太多，供唔供股要再睇定啲，未咁快決定，而家個市立立亂，唔會聽專家意見，會自己做決定，都要睇定啲好。」
鄺美雲：恐跌到20元
「我只可以講點解對冇信心嘅事上仲要買多個冇信心呢？我覺得唔應該再對匯豐有感情，唔贊成再供股，除非去到20蚊我就買，分析過恆指仲會跌，因為97年亞洲金融風暴跌破9,000點，而家係全球金融風暴分分鐘跌到8,000點，好多人話投資睇長線，其實正確投資唔分長、短線，而係分賺同蝕，留番啲現金傍身好啲。」
陳豪：唔再趁低入
入市價逾 $100
「我係百幾蚊買入，會睇定啲先，按兵不動住，我諗唔會再趁低吸納，至於供唔供股住就有所保留，我唔係啲瘋狂投資迷，呢個市咁樣真係估唔到。」
吳君如：現金勝股票
入市價約 $124
「我喺124蚊買入，對股票呢啲嘢我已金盆洗手，唔再俾啲33蚊誘惑，升同跌我都唔理，我唔會再買股票住，以前4萬點（編按：恆指歷史高位應為31,958點）皆大歡喜，吸收過教訓我唔會再信啲乜嘢消息，幾穩陣都化為烏有，而家咪以不變應萬變，最好都留現金喺身，供唔供股要同媽咪商量過先。」
鄭嘉穎：寧炒內地股
入市價約 $58
「我喺58蚊嘅時候買入匯豐呢隻股票，61蚊就放晒，賺咗少少，好彩放得快，今日跌到33蚊，真係一個好吸引嘅價錢，如果聽日跌破30蚊，我就會即刻入市，但唔會選擇供股，因為而家個市咁混亂，連匯豐都可以跌到咁殘，呢個世界仲有乜嘢唔可以發生呢！不過我覺得近年炒內地股會比較穩陣。」
鄭裕玲
http://appledaily.atnext. ... art_id=12473918
