農夫成員陸永噚日喺網上擺咗條短片，喺片段度見到佢化行妝，戴晒長假髮、着住背心同長裙扮女人，仲好大動作話：「農夫高嗰個話扮我呀，等佢哋兩隻嘢，永遠冇話準時㗎，喂，農夫你哋嚟未㗎？我晏晝五點就瞓喇！」睇完佢啲動作同語氣，估到佢扮嘟姐（鄭裕玲）！馮仁昭打電話問陸永點解咁大膽扮嘟姐，佢喺電話度笑住話：「冇話過扮佢，我只係扮緊女人啫，我邊忽似嘟姐呀？佢咁靚！」
陸永喺惡搞短片中扮Do姐（嘟姐），又幾神似喎。
拍完至識驚
陸永話佢最近同C君、嘟姐合作拍一個手機程式廣告，內容話佢同C君千辛萬苦尋找心中女神，唔單止遇搞笑嘢，佢兩個仲會各自扮一個女神，佢話：「我心目中嘅真女人係嘟姐，所以我一扮女人就似佢。」話晒佢哋合作過做節目，所以基本上扮佢係冇難度，佢話：「段片係冇稿，只係要求我喺度扮嘟姐，佢哋一路問我一路答，所以好容易嘟姐上身，對咗嘟姐咁耐，喺佢身上學咗佢快狠準嘅一面。嘟姐知我會扮佢，但係影完相嘟姐就走咗，所以唔知佢睇咗未。」
陸永賣口乖話：「事實上佢都係一個好溫柔嘅女人，我冇做到佢溫柔嘅一面，𠵱家出咗街之後好驚呀，我想補拍番個柔情呀！」
陸永事後先至識驚，話想拍番條柔情版。
from:
http://hk.apple.nextmedia.com/entertainment/art/20130530/18276556
