莫文蔚三吋高短跑

著住三吋高踭鞋嘅Karen ，不斷跑來跑去捉客去睇樓，好在佢平衡力有番咁上下，NG 多次都冇拗柴。
由爾冬陞監製、趙崇基執導嘅新戲《一路有你》喺香港拍幾日，就會北移大陸取景，身為女主角嘅莫文蔚早排就長沙灣埋位。
飾演地產經紀嘅Karen ，當日要同成班臨時演員邊跑邊追截路過嘅名車，捉客睇樓搵生意。為咗拍攝出蜂擁場面，導演NG 完再NG ，搞到著住三吋高踭鞋、來來回回玩短跑嘅Karen ，真係少嘅平衡力都唔掂，之後拍上半身鏡頭，Karen 即刻換番對波鞋埋位，等雙腳休息一下。

下半身唔使入鏡，Karen 即刻換番對波鞋，等雙腳可以鬆一鬆。

夠鐘放食飯，Karen 同導演趙崇基一齊街邊開張摺枱開餐，唔怕俾人觀摩食相。

大富之家出身嘅Karen 唔單只捱得痛，亦唔介意同導演趙崇基街邊開張摺枱慢慢嗒佢盒肉餅飯。