一場淫照風暴，令捲入事件的三位主角陳冠希、張柏芝、鍾欣桐一鋪清袋，不過，隨住一年過去，事件開始淡化，三人亦部署復出。
上週四（二月二十六日），張柏芝搶閘接受有線訪問剖白心情，第二日訪問出街，校岩時間，插爆陳冠希「貓哭老鼠假慈悲」，令身在新加坡出席廣告活動的Edison 走後門避風頭，復出第一炮即被打殘。
柏芝出招，Edison 復出步伐再被拖下來，其實去年爆發淫照後，Edison 因形象插水，被廣告商追討賠償，最終賠了過千萬平息風波。山窮水盡，柏芝又咬實唔放，據知，柏芝更徵詢律師意見，希望以受害姿態，向Edison 索償，愈玩愈大。
27/2 新加坡
到達Carl's Jr 漢堡包專門店的Edison ，見在場百多名fans 吶喊，表現風騷，隔住玻璃向他們揮手。但當獲悉柏芝公開插爆後，心情即時大跌。
只肯透過經理人回應「全部都係自己唔岩」的Edison ，一聽柏芝名字，即起身走人。
25/2 溫哥華
作供完畢，Edison 輕鬆不少，與母親離開法院時，明顯回復自信。
柏芝主動出擊，接受有線訪問插爆舊愛陳冠希，期間更數度落淚。
Carl's Jr 漢堡包廣告活動，是陳冠希復出第一個工作，酬勞有六位數字，他全數捐到「壹基金」做慈善。
急轉直下
在溫哥華完成一連兩日作供，溫哥華時間二十四日中午，Edison 步出法庭顯得輕鬆不少，被記者追問復出大計，他開腔祝願一班女受害人：「我希望所有女受害人都可以企番起身，重要過我幾時復出！」
不過，Edison 的說話，卻隔空觸怒了在港的張柏芝。上週四（二月二十六日）下午三時，謝霆鋒由愛都大廈寓所出發到柴灣工作，引開一眾在場守候的記者，同一時間，柏芝已經趁亂離開，到荃灣有線電視接受訪問。
由律師陪同的張柏芝，在訪問中毫不留情狂插陳冠希，直指他「貓哭老鼠假慈悲」、「受夠係受夠你（陳冠希）」，主持區永權發問並不多，全程幾乎由柏芝連珠炮發，其間更激動至數度落淚。據知柏芝今次的訪問，當中有不少敏感內容，有線接受法律意見再經刪剪，才於翌日播出街。
校岩時間，在新加坡出席Carl's Jr 漢堡包廣告活動的Edison ，遇上柏芝公開數臭，由原本輕鬆到場，心情急轉直下，擾攘一輪才接受訪問，亦講明只談工作。
明顯不知所措的Edison ，聲線微震：「嚟緊一年，我會將所有娛樂工作嘅收入，捐俾『壹基金』作慈善用途！」記者一提柏芝，Edison 的經理人便第一時間護駕他離開。轉場出席Adidas 周年派對，更出動保安撐傘，阻擋記者拍攝。
「Edison 收到風知道柏芝鬧佢，了解咗內容之後，佢情緒係有嘅打擊，但佢唔想一人鬧一句，佢同經理人講唔會再講嘢！」知情者說。
1/3 新加坡 被柏芝公開鬧爆的Edison ，離開新加坡時木無表情不發一言，左手仍然戴喺他與Vincy 同時擁有的情侶手
。
兩個版本
柏芝在訪問中，直指Edison 沒有向女受害人道歉過。「一年前，佢開記招話盡一切能力保護女受害人，佢冇做到……佢冇保護我哋，嘅相喺網上繼續流傳，佢冇用任何方法去制止，我哋何來有安寧？何來可以站出嚟……我想用幾個字形容佢，貓哭老鼠假慈悲。事件發生冇同我哋講過一句對唔住，只係識同公眾講。」
不過，當時情況卻有另一版本。「喺件事發生第一日，柏芝嘅經理人Emily 打電話俾Edison ，之後交俾柏芝聽，柏芝問Edison ：『點解會咁？』，Edison 仲答佢：『我都唔知發生咩事！而家同公司開會商量緊……』嗰陣大家都六神無主，不過，Edison 喺嗰個電話已經同柏芝道歉。之後，柏芝被放上網嘅相愈嚟愈多，佢前前後後足足改咗六次電話，依家都唔係好多人可以搵到佢！」知情者說。
被柏芝形容為「我哋冇佢咁好彩，佢可以去外國發展，簽歌手自己做經理人」的陳冠希，避走美國後實情並不風光。
「Edison 舊年二月廿一日返香港公開道歉前，因為收到恐嚇電話，警方先至出動咁多警力保護佢，今次改去溫哥華作供，警方都衡量過輕重，認為佢留喺香港有危險，佢根本唔走唔得。」知情者說。
26/2 溫哥華
溫哥華時間26 日凌晨，Edison 起程轉飛新加坡，出席兩個廣告活動，一直默默支持愛兒的陳母，亦有到機場送行。
02 年，柏芝與Edison 傳出緋聞，兩人感情更從未間斷，即使同霆鋒復合後仍一齊。（《蘋果日報》圖片）
爆發淫照後，無面見人的柏芝，去年六月趁霆鋒到泰國拍《風雲II 》，抱埋個仔去箍煲。
神不守舍
停工一年，零收入，去年更因淫照事件要向多個廣告商退還所有酬勞，賠償接近一千三百萬。
「淫照流出之後，經理人要同廣告商解釋，不過，最後都係賠錢解決，退咗千幾萬俾幾個廣告客，有部分錢係公司幫Edison 墊支。Edison 要撐起成頭家，每個月俾幾十萬老豆使，家姐租屋又係佢俾錢，依家見件事慢慢平靜，公司兩個月前開始幫Edison 喺出面接job ，主要集中喺東南亞地區。Carl's Jr 漢堡包嘅廣告其實喺出事前已經傾落，依家酬勞減咗，但都仲有六位數字，adidas 個活動，就係佢clot 嘅拍檔Kevin Poon 幫佢傾嘅。」
復工之路未穩，已經被柏芝狂𡁻。廿九日早上六時多，Edison 離開新加坡下榻的Grand Hyatt ，出發到機場飛返加拿大，沒精打彩的他全程神不守舍，對記者所有提問充耳不聞。
訴諸法律
相反，校岩時間出手的張柏芝，部署復工明顯比對手阿嬌、Edison 更有計劃，有線訪問出街後，她又錄了一段片賀素未謀面的人氣新人Angela baby 生日，連同老公謝霆鋒在大陸接受電視台晒夫妻於淫照事件後更恩愛，有計劃地曝光。
「其實兩個幾月前，柏芝已經四出拗撈，佢同經理人Emily ，都分別打俾唔少電影公司老闆同導演，好似爾冬陞、方平、向太、王晶等，同佢哋講話，好想再拍番戲，叫佢哋有角色岩預埋佢！」
據知，柏芝狙擊Edison 還有行動第二波，她已向律師徵詢，可否以受害人身份，以Edison 未能承諾保護相片，追討賠償。張柏芝訴諸法律早有先例，○七年，她提前與中國星解約，一度反向「中國星」追討一千五百多萬，激到一手栽培她的向華強太太忍唔住公開指摘，最後，由張柏芝方面提出庭外和解了事。
去年二月廿一日，Edison 返港在九展開記招交代淫照事件，並公開導歉，當時警方便出動二百名警員、藍帽子開路，事緣返港前Edison 曾收恐嚇電話。
三角情仇
去年初爆發淫照事件後，陳冠希被揭與多位女星有親密關係，當中包括已與謝霆鋒復合，且結婚生仔的張柏芝，柏芝因而被踢爆當時曾一腳踏兩船。其實，謝霆鋒與陳冠希是中學同學，相識多年，過往兩人不論工作和感情，結下不少恩怨。
識於加拿大
謝霆鋒和陳冠希相識13 年，兩人95 年在加拿大就讀同一所中學而認識，並成為好友。
競爭對手
霆鋒出道不久已成電影圈搶手貨，其中拍攝陳木勝的電影《特警新人類》更令人刮目相看。不過00 年陳冠希一出道，風頭即蓋過霆鋒，接棒拍《特警新人類2 》，火速成少女偶像，搶了霆鋒不少Fans 。二人當時同屬英皇旗下，已盛傳不和。
同學變情敵
02 年柏芝曾一度介入霆鋒和王菲戀情，但03 年「王鋒戀」復合，柏芝被飛大受打擊，行為變得癲喪，身邊男伴更車輪轉，03 年2 月，柏芝搭上霆鋒的同學陳冠希，兩人更被目睹同遊日本。
大話情人
06 年霆鋒和柏芝因拍《無極》復合，當時霆鋒曾問過柏芝，她與陳冠希的緋聞是否屬實，女方否認。08 年初，跟霆鋒已結婚生仔的柏芝，被捲入陳冠希的淫照事件，因而被揭與霆鋒復合後，其間一腳踏兩船，有指霆鋒為此曾怒掟戒指要離婚。
酒店動粗
淫照風波之後，霆鋒和柏芝曾一度搬離住所避風頭，在四季酒店暫住。有指霆鋒在酒店內與陳冠希陝路相逢，大打出手。
霆鋒指婚前淫照是小事，但據知他獲悉真相後，足足一個星期無睬柏芝。（《蘋果日報》圖片）
精彩對白
柏芝主動接受有線專訪，霆鋒亦就岩時間，接受湖南衞視訪問，大晒自己有幾愛幾支持柏芝。
我能做的就只是牽喺太太的手去逛街，去看電影，逛商場的時候我問她：「你知道在這麼大的商場裡我看見什麼？」她問什麼？我說：「我只看到我和我的太太在我們的世界裡享受自己的生活。」我從不在意路人和指指點點。
路遙知馬力。大概是三年前，我記得在上海有記者問我，你覺得你的個性直率，比較真，還是陳冠希比較真，我看喺採訪的記者說：「你新來的？」然後我沒說話。
這個世界根本沒有公平，法官也是人，就像我坐牢的時候，很多高官、警察他們都對我說今天在這裡因為你是謝霆鋒，從來沒試過那麼簡單的案子可以有幾千人在法庭外大喊你的名字，從來沒試過，這可能影響判出來的結果。
以柏芝為榮
一家人共同進退，謝霆鋒日前接受訪問大講夫妻間過去一年的家庭生活，沒有因為淫照事件影響感情，他亦沒有恨過陳冠希。至於傳聞去年十二月初在奶奶狄波拉教唆下，謝霆鋒經濟封鎖外母，張柏芝因而跟母親鬧不和，但兩母女原來早已冰釋前嫌。
「佢哋無聯絡差唔多四個幾月，係柏芝主動打電話俾媽咪，約佢聖誕節一齊慶祝，兩母女邊有隔夜仇㗎，尤其係柏芝媽咪睇完個女喺有線嘅訪問，佢話自己好心痛，因為柏芝習慣報喜不報憂，佢冇諗過柏芝心情差到咁緊要，甚至唔同媽咪聯絡。」知情者說。
本週一晚（三月二日），張柏芝媽咪相約友人在金鐘海都食晚飯，約十時半離開，甫見記者在扶手電梯旁守候，柏芝媽顯得十分緊張，對於柏芝公開講淫照，她說：「我都有睇過訪問，佢好勇敢，最緊要係可以話俾嘅女仔聽，做錯事要承擔，要認錯，我真係以呢個女為榮，我冇咩再想講，多謝關心。」
