吳君如順口踢爆「集郵女星」癖好，不過單料愈吹愈大，上週五錄影《星星同學會》急補鑊話其實當日只係做口形搞氣氛，忽然轉口風，有嘅蹺蹊。
藝人衰嘢輪住爆，繼苑瓊丹及官恩娜後，最近吳君如（三姑）於《星星同學會》中，竟爆響口話娛圈中有位怪癖「集郵女星」，以勾搭當紅男演員為榮，更稱四大天王獨欠劉華。
君如爆料唔爆名，搞到全城齊估「集郵女星」係邊個，據知節目中君如的確在劉華耳邊講了一名女星名字，而且該名稱只有兩個發音，不過家陣風波鬧大，上週五（上月27 日）君如即轉口風話：「只係夾口形搞氣氛，交戲咋！」凹晒水咁，唔似三姑態度喎！
有邊個儲唔夠一套，你話我聽
！XX ！
喂！黐咗咪呀！
喺上月22 日播映嘅《星星同學會》中，君如喺華仔耳邊爆「集郵女星」名字時，華仔聽到都嚇咗一驚。由於華仔同君如身上均黐咗咪現場收音，現場人士隱約聽到兩粒音，當時的客席主持杜汶澤忍唔住大嗌：「黐咗咪呀！」反應咁真唔似交戲喎！
我知，係邊個邊個嘛！真實對白
陳總配合
被記者連環迫供，君如即搵在場嘅陳總陳志雲做擋箭牌，佢同陳總更即場示範點樣夾口形，之後陳總仲交晒戲話：「我知，係邊個邊個嘛！」配合晒！
出名講嘢是但噏的吳君如，早輪喺電台節目《嘩！嘩！嘩！打到嚟》中話中國國寶劉翔「係咪食咗屎」，遭網民狂插，至兩週前於《星星同學會》訪問劉德華，三姑又忽然話娛圈中有個「集郵女星」喜與男星搞關係，經上週日播出的集郵女星話題催谷，週日（1日）播出的《星》收視由19 點連升2 點至21 點，多咗近13 萬觀眾捧場。
「似謝安琪」
但君如上週五（上月27 日）到TVB 錄影新一輯《星星同學會》後，面對記者追問「集郵女星」一事，君如突然封口：「只係夾口形搞氣氛、交戲咋！呢啲係主持技巧啫，我講咗100 次冇呢個人咯！（你最近好多是非喎？）係啦！人紅是非多，好似謝安琪咁！」
君如一句「搞氣氛」以為可以打圓場，但行內流傳「集郵女星」真有其人，據知情人士說：「當時君如喺華仔耳邊講咗兩粒音，事後君如見嘅傳媒煲得咁勁，惟有叫監製命令現場班工作人員，逢記者問到『集郵女星』一事都要封口。而君如就同監製協議，話自己只係做口形交戲，費事件事愈鬧愈大。」
真有其人
與劉德華合作過的兩粒音女星眾多，暱稱「靚靚」的袁詠儀上週六（上月28 日）出席強積金講座時，就好鎮定話肯定真有其人。
F ：《FACE 》 袁：袁詠儀
F ：君如係咪話「靚靚」呀？
袁：吓！咁益我，係我都唔mind ！
F ：你曾經講過個「集郵女星」有特別怪癖喎？
袁：總有嘅人有特別性癖嘅！
F ：咁係咪真有其人呀？
袁：梗係有啦，但君如都唔講，點解要講畀你（記者）聽呀？
靚靚同君如咁老死，靚靚都話有，君如又唔使驚得咁緊要喎！
邊個愛集郵？
喺四大天王年代活躍嘅「兩粒音」女星，兩隻手數唔晒，究竟係邊個？又係嗰句，自己諗！
咁益我？真實對白
袁詠儀 靚靚
靚靚與四大天王均有合作，又喺圈中識得人多，佢話知道邊個係「兩粒音」集郵女星，不過死都唔會講，靚靚仲潤三姑：「君如冇用，又講又唔肯認，再講就殺咗佢！」
《蘋果日報》圖片
邱淑貞 豆豆
暱稱豆豆嘅邱淑貞80 、90 年代跟住王晶搵食，亦拍過唔少四大天王做主角嘅電影，如今已嫁給I.T 老闆沈嘉偉兼有兩個乖女的豆豆，十足廿四孝阿媽。君如咪累到老友呀！
美聯社圖片
張曼玉 Maggie
早於88 年已跟劉華在《旺角卡門》激咀過的Maggie 張曼玉，同四大天王都有合作兼相熟。
鄭秀文 Sammi
鄭秀文Sammi 近年同劉華合作無間，她跟許志安未正式甩拖時，亦曾跟古天樂、謝霆鋒傳過撻喺，不過同四大天王就冇乜緋聞。
華仔都爆料
當日《星》訪問中，華仔亦自爆有位合作過嘅導演令佢怕怕，亦爆埋當年上《歡樂今宵》唱live 被某歌手寸入唔到key 嘅陳年
事，一位劉華身邊人就同本刊爆料：「華仔以前成日同我哋話怕咗邱禮濤，唔想同佢合作㗎！」至於寸爆華仔唔好唱live 的歌手，有傳係浪子王傑，對此華仔就透過助手回覆：「講得嘅都講咗啦！」
《忽然1 周》圖片
迷糊導演
據華仔形容令佢不滿嘅導演：「唔做功課……永遠都唔見佢清醒做一樣嘢……剪片剪到一半就咁交畀人剪就算。」而99 年華仔拍住日本女星石田光演《愛情夢幻號》，此戲曾被影評人批評係爛片兼剪片冇重心，此戲導演正是邱禮濤，自拍完此片後，兩人再無合作。
《蘋果日報》圖片
寸爆歌手
華仔當年上《歡樂今宵》唱〈情感的禁區〉入錯key ，佢話事後被某歌手寸：「唱唔到現場就唔好唱啦！」據知此人正是王傑，當年仲係浪子嘅王傑曾直言四大天王唔係神，寸劉華唔出奇。
