每個人，包括你同我，現實都愛追求零缺陷無瑕疵的完美。
但如果五體不健全，腳歪了，是否就注定終此一生不能得到被愛？
「Nicky 」，一隻行到邊去到邊都被人貫以注目禮的金毛尋回犬，連我這般閱狗無數的，都像被點穴一樣，看一眼便沒法再抽離視線。事關「Nicky 」有一段不一樣的童年；和一隻不一樣的前腳掌。無論或行或坐或企，那隻前掌都是L 形向外翻的。原因可能曳可能被當成發洩出氣袋，約八年前不足十個月大的「Nicky 」，被人施以暴虐極刑監生摳跛了！「我唔覺得『Nicky 』同其他金毛有乜分別喎！」明知「Nicky 」行動不便仍決意收養，為彌補那一隻殘而不廢的腳掌缺陷，而替愛犬取名「Nicky 」（與leg 同音，心理上，就當俾番一隻完整嘅腳佢！）的阿珊語氣堅定地說。
我不單止在「Nicky 」身上，看到了人自以為神所作的濫暴遞奪剝削萬物眾生權利的醜惡面；我同時在阿珊倔強的眼神中，看到了毫無保留的人之初真善大愛。
儘管毛白得像老年狗，但童心未泯的「Nicky 」，對喺鏡頭還是會像BB 狗一樣表現充滿好奇。
為怕愛得太遲，阿珊這兩三年間一有時間，就四圍帶「Nicky 」遊山玩水識狗見人，並為「Nicky 」留下一張張動人倩影。
「Nicky 」的腳雖然自幼被摳跛了，卻殘而不廢，還有力支撐66 磅重的身軀；只是行動[龜速極緩慢，易
氣喘急。同一段50 米直路，正常金毛可能唔使7 秒跑到終點，但「Nicky 」就要用上五、六分鐘金蓮慢步。
信以為真
如何承受這好奇，答案大概似剃刀鋒利——「Nicky 」的故事，聽在耳，心就像被針刺。
時光倒流回到2000 年仲夏。
那年阿珊中七，待放榜，在一間寵物店做暑期工。鋪內芸芸待售的小狗之中，其一是「Nicky 」。「當時老細話佢
澳洲返，仔，唔夠十個月大，所以仲未爆骨（如同小孩骨架會拉長發育），頭形仲好尖細。」奇怪的是，已經三呎長的身軀，不單止被安排屈在一個唔知有冇三呎長的鐵籠之中，而且左邊腳掌，咦點解拗柴嘅？「我有兜口兜面問過老細，佢解釋話因為有個同事新入行，唔識就力，
「Nicky 」落飛機籠過籠時，夾硬扯到隻狗跛咗。」年少無知信以為真的阿珊，覺得「Nicky 」好可憐，更加倍待牠如珠如寶。老闆看在眼內，終於開口：「你咁錫佢，屋企又住村屋、有天台有簷篷，不如我唔收錢送咗俾你啦，你唔要的話，我就車佢入狗場㗎啦。」細問有經驗的同事之後，大驚，個個形容到狗場似人間煉獄！於是不加考慮，就向老闆舉手話要。怎料家人一見到「Nicky 」，劈頭第一句竟說：「嘩乜咁嘅？我唔理㗎，你唔好旨意我呀！」反應一面倒。
不能承受的痛
軟化屋企人需要時間，阿珊唯有搵同事朋友先幫手。「因為佢太大隻，搵勻都冇現成狗籠岩佢訓。」只得搭上搭搵人度尺燒焊自砌天台鐵屋，「Nicky 」卻絲毫不領情。「佢成日閃閃縮縮，左捐右捐入嘅花槽底匿埋訓，硬係好似好驚人咁。」於是同男朋友日日帶佢去街街，鍛鍊其步行能力同時練大膽子。卻在某天，一個人在天台打掃時，只不過隨手舉起掃把啫，「Nicky 」反應竟驚到腳震軟蹄，令阿珊更覺事有蹺蹊。直至一次舊同事飯局，從前老闆的朋友口中，終於得知叫人髮指真相！「喂唔係人哋講你就信呀，你真係咁天真，以為人手可以扭跛一隻狗腳？你隻狗隻腳，係俾人監生摳跛㗎！」阿珊說聽完之後，即場面紅耳赤，成肚火，心口鬱住翳住，抖唔到氣，直頭想喊！
酵母菌肆虐
若你喜歡怪人，其實我很美——阿珊就話情人眼裡出西施，於我，眼前的「Nicky 」絕對和一般金毛有明顯分別。
9歲狗，舉止老態龍鍾，毛色白化程度似14 歲狗瑞，問題在於「Nicky 」自小就體弱多病。由於家住大帽山腳，濕氣超標，皮膚病嚴重到，惹上了最難搞惡斷尾的酵母菌，全身如同垃圾腐物的惡臭，嘩勁起上嚟，即使「Nicky 」住三層高村屋天台，地下最底層鄰居都投訴聞到！「獸醫建議至少每三日沖一次涼，但屋企人人要返工，無可能！所以keep 住用藥物治理，食到底子孱腸胃差。」加上06 年8 月，「Nicky 」一雙後腿又無故乏力，行唔郁繼而企唔到，日復日衰退急轉直下程度，好似人類中風癱瘓咁，忽然連下半身都無反應！獸醫初步懷疑中牛碑熱，但經過照X 光超音波抽血大堆驗症，還是原因不明！只得用猛藥保命，什麼抗生素、特效藥、關節針……可試的能試的都試！最慘係老早預好9 月頭去旅行，人腳、假期同錢，通通不可能話取消便取消，母親又年紀大獨力照顧不了，唯有請dog sitter 每天返全鐘協助打理。「雖然焗住飛，但根本冇心情玩，日日都掛住打長途返香港問長問短！」猶幸「Nicky 」病況漸有起色，胃口好了精神好了，阿珊才得以放下心頭石。「事後都足足用咗一段好長好長時間幫佢康復。」長期服重藥後遺症，導致「Nicky 」比同齡犬加速老化。
有冇後悔過？「曾經都有自責：我係咪太自私？可能早早送佢一針，『Nicky 』就唔使受咁多痛苦！不過呢類負面念頭都只係一剎那，因為自從有『Nicky 』嗰日開始，我已經當咗佢係命根！」單憑「Nicky 」從相中流露的樂天笑容，我都能感受得到那種被人當寶寵愛的幸福。
眼前的「Nicky 」，像皇帝一樣被阿珊無微不至呵護喺，慢慢行慢慢食慢慢飲，阿珊男友則專職服侍抱上抱落陪玩hand hand 。知道上雜誌，阿珊還特備醒目頸巾俾「Nicky 」扮靚仔，同居狗友松鼠「番薯」邊有呀！
