眼冤咀
鄧麗欣（Stephy ）又拍葉念琛嘅新戲《保持愛你》上畫，再做女主角就預咗，之但係本來配角一名嘅謝安琪因為人氣急升，宣傳海報個大頭即時搶眼過Stephy ，FBI 都戥佢唔抵；好彩之後好多宣傳已唔見謝安琪，大家都估到咩事！
風頭又被搶，Stephy 除咗夾硬咇出勉強笑容外，又真係好難畀其他表情嘅。
不過前門拒虎，估唔到後面仲有個同門Theresa 追擊，上星期二（17 日）《保持愛你》首映，FBI 都以為Stephy 可以威威啦，點知影完大合照，壓軸仲殺出一向同Stephy 傳不和嘅傅穎（Theresa ），Theresa 一出場就轉晒身分享佢嘅大露背，又要拖埋艾粒少爺占即場咀番啖，Theresa 仲要唔覺意咁同記者講：「我呢件衫好難唔真空㗎。」Stephy 又變配角。
FBI 睇過套戲，Theresa 只係做紙板女郎，塊紙板仲要出場唔夠10 秒鐘，今鋪搶贏晒，Theresa 又爆多句：「Paco 叫我今日喺靚嘅，用番紙板公仔嘅造型出嚟喎。」哦，原來係Paco 搞事，咁Stephy 都冇得怨啦，你敢反老細枱咩？
喺戲入面Theresa 係艾粒心目中嘅女神，所以活動上同少爺占慶祝生日，記者要求兩人互咀，但Theresa 話情人節宣傳新唱片時因為咀過男fans ，就算隔住膠片仍然俾其他fans 呷醋投訴，所以只肯畀少爺占錫面喎。
兩頭擰Theresa 壓軸殺到，企咗喺大家面前成分鐘，Stephy 就兩頭擰，門面工夫都唔做吓，好難令人信冇不和喎！
傅穎喺戲入面個紙板樣（左）只係出現咗10 秒，喺首映竟然可以做壓軸嘉賓，老細Paco 擺明當Theresa 係金牌一姐，難怪Stephy 火燒心啦。
萬五蚊陪襯Stephy 專登喺紐約買咗呢套低胸靚衫，加埋對美國品牌Barbara Bui 短boot ，夾埋約萬五蚊出席首映。點知都係做輸家，難怪佢話：「又傳呢啲，真係慘。」
$6,000 撼贏傅穎都唔輸蝕，喺番為新碟MV 而訂做嘅露背裙，都值6 千蚊㗎，唔怪得咁有睇頭啦！
包抄夾另一同門姊妹Miki 喺活動中亦自爆真空上陣，超短裙內里透視黑絲襪，索到爆，連Stephy 睇到都打個突，佢句潛台詞應該係：「乜今日對手咁勁！」
楊愛瑾（Miki ）喺戲中演網絡情人小金魚，同艾粒發展成一日情侶。
