中國歌后張露上月病逝，兩個乖仔杜德智同杜德偉日前幫亡母搞追思會，噚日杜德智、杜德偉同埋爸爸及親友，大約一點幾到灣仔律敦治醫院領取張露嘅遺體，準備往火化，之前佢哋先進行簡單嘅天主教儀式，大約20分鐘後，杜德智捧住亡母遺照步出，佢將遺照放喺靈車度就上另一架車，杜德偉就跟住上靈車陪同媽咪行完人生嘅最後一程路。
杜德偉噚日全程扶住爸爸，佢話日後會抽多啲時間陪佢。
張露遺願希望兩個乖仔早日成家立室，咁希望杜德偉同女友Bibe （左）快啲拉埋天窗。
母盼兒成家立室
張露遺體運送到柴灣歌連臣角火葬場以天主教儀式火化，現場親友頸上都戴住十字架，杜德偉同杜德智神情落寞，扶住爸爸目送亡母火化，杜德智捧住亡母遺照，短短五分鐘儀式後，三父子鼻子一酸咁離場。由於杜德偉爸爸行動不便，佢全程由乖仔小心翼翼扶住，之後同親友到北角食解穢酒，杜德偉話：「準備咗媽咪生前好鍾意嘅銀包同埋戒指、耳環、眼鏡做陪葬品，仲有追思會當日來賓簽名同我哋親手寫嘅信，等大家分隔開都有一種聯繫。」骨灰一半會放喺搞追思會嘅善緣供奉，另一半就會運去上海。爸爸表現哀傷，杜德偉嘆息話：「爸爸好傷心，瞻仰遺容時有啲聽唔明神父講乜，我不斷望住爸爸，見佢百感交集。」講到亡母遺願，杜德偉話：「佢好希望我哋成家立室，呢方面已經有晒默契，媽咪離開咗我哋都冇遺憾，往後會抽多時間照顧爸爸。」
杜德智捧住亡母張露嘅遺照，將母親遺體由醫院運去火葬場。 胡恩宏攝
http://appledaily.atnext. ... art_id=12219010
