最好搶過我！（真實對白）
對於有傳驚毛毛搶過自己，43 歲君如就話：「冇啲咁嘅事！」之後急急腳走番入更衣室，唔多想答。換轉以前，寸爆君如一定鬧到記者狗血淋頭。做咗人阿媽，好品晒。
一向敢言的吳君如，在無線《星星同學會》寸盡花旦小生；電台節目《嘩！嘩！嘩！打到嚟！》又話國寶劉翔「食咗屎」。膽生毛冇有怕，原來都有死穴。
據知《家有囍事2009 》老闆黃百鳴，食住條水想搵《家》片icon 毛舜筠客串一場，講明同吳君如擦出火有爆位對手戲，點知君如收風後大為緊張，擔心毛毛搶過自己，於是即向黃百鳴詐型，老闆息事寧人，惟有將呢場客串戲蒸發，令到《家》片自己人毛毛冇得留低。
43 歲吳君如不嬲有鋪話事癮，無論主持電台同電視節目都鍾意個人騷，所有拍檔都要捱下把，唔可以搶過佢。早前《星星同學會》就因為拍檔錢嘉樂搶過佢，而令到君如唔多like 。
大家平分秋色啫！（真實對白）
對於被君如打壓，45 歲毛舜筠只話自己冇期先客串唔到《家有囍事2009 》，但係《畢打自己人》每星期多數開工五日，每日開工時間都係朝九晚七，客串一場有時間喎！
《星星同學會》播咗5 集，平均收視都成21 點，以週日晚時段成績超好，可惜君如就嫌拍檔家樂仔轉數太快，搶過自己唔多like 。
詐型擋路
做主持話晒事，拍戲都要打晒骰。賀歲片《家有囍事2009 》老闆黃百鳴，原本想搵毛舜筠客串，同吳君如嚟場對手戲，更親自打電話畀毛毛，毛毛都相當有興趣，雖然拍緊無線處境劇《畢打自己人》，但檔期唔緊迫，好易話為。本來大家有好戲睇，但身為《家》片導演兼君如好友嘅谷德昭，亦深知君如唔鍾意有人搶過佢，於是即刻報料。
君如收風後即時搵黃百鳴講數。「佢同老闆詐型，話原先冇聽過有毛毛要客串，點可以臨時咁加法，老闆怕咗佢，咪惟有cut 呢場戲囉！」知情人士透露。
上週一（9 日）君如為《星星同學會》錄影，問到佢打壓毛毛客串一事，君如好老脾，仲大方咁話：「最好佢搶過我！」真唔真心㗎？
F ：《FACE 》 吳：吳君如
F ：拍戲咁耐，會唔會驚客串嘅人搶過你呀？
吳：唔會，最好佢搶過我，唔係搵佢嚟客串做咩呀？
F ：但黃百鳴原本想搵毛毛客串《家》片，你驚人搶過你，唔畀佢客串喎。
吳：冇啲咁嘅事呀，你響度「撩」我，搵邊個客串我鬼知咩，你問番老闆啦。
老闆黃百鳴上週三（11 日）亦認有搵過毛毛客串，不過就話因為毛毛冇期惟有擱置；至於毛毛對於君如話驚咗佢，佢就話：「大家響呢行咁耐，點會有啲咁嘅事呀？冇話邊個搶邊個，大家平分秋色啫！」
！三姑唔使驚喎，毛毛當同你打和咋！贏唔到你㗎！
'09 版
雖然《家有囍事2009 》有古天樂又有鄭中基，但最多戲分、最多笑位，始終都係女主角吳君如。成套戲完全係佢個人表演。
'92 版
92 年《家有囍事》有張國榮、周星馳、張曼玉，呢個陣容夠殺有凸啦，當年君如只係飾演黃百鳴老婆程大嫂。票房就有成4 千8 百萬，認真犀利。
上排左起：張曼玉、周星馳、吳君如、黃百鳴、陳淑蘭、張國榮、毛舜筠、關海山、李香琴
據知阿Sa 一角係君如親自搵佢幫手客串，貪佢夠人氣，仲一定唔會搶過佢。
早前黃百鳴在《星星同學會》內仲話想搵星爺幫手，點知對方話「你哋夠晒人，唔使我啦！」。好彩冇，有埋星爺，君如真係冇碇企。
黃百鳴
谷德昭
唔夾口供
黃百鳴：係搵過毛毛，記得都好似係同君如對手戲，（君如詐型？）唔係，總之而家套戲收得就開心啦！
谷德昭：黐孖筋，你講呢個故事，直頭係《家有囍事2010 》，好正，不過黐線！
《家有囍事2009 》
《游龍戲鳳》
劉華尾二
今年賀歲片有咁多，直至2 月12 日（上週四）為止，《家有囍事2009 》收成2 千4 百萬做大贏家，第二位係《崖上的波兒》收2 千3 百萬，反而劉華、舒淇嗰套《游龍戲鳳》雖然票房包尾，不過都有成1 千2 百萬，其實都唔算太差。
票房收入
第1 位《家有囍事2009 》$24,154,876
第2 位《崖上的波兒》$23,290,003
第3 位《奇幻逆緣》$20,785,280
第4 位《超級零零狗3D 》$14,852,678
第5 位《游龍戲鳳》$12,190,302
第6 位《馬利與我》$7,083,329
