久未喺香港露面嘅楊紫瓊，本周二（10 日）專登返香港出席「無限慈懷基金會」成立晚宴，風塵僕僕只係為咗見吓藏傳佛教第十七世噶瑪巴大寶法王泰耶多傑。
媽咪姐聽講紫瓊同大寶法王好有淵源，因為佢嘅已故好友梅艷芳生前篤信藏傳佛教，試過帶紫瓊見自己師傅大寶法王。就因為咁紫瓊當晚得到大寶法王親自接待，而能夠同紫瓊有相同待遇嘅，就只得專程來港撐場嘅不丹皇后同公主。紫瓊咁有face ，難怪佢事後大嗌lucky 。
楊紫瓊在梅艷芳生前好友連炎輝（戴眼鏡）陪同下跟大寶法王握手寒暄，事後即說：「真係好lucky （幸運），可以改到行程趕返香港同佢見面。」
基金會第一項計劃係同世界眼科組織攜手喺不丹興建眼科中心，因此能邀得不丹皇后（左二）同公主（左三）專程來港撐場，大寶法王亦親自接待兩位特別穿上民族服飾的皇室成員。
前日本國家足球隊成員中田英壽點解會出現？除咗係虔誠佛教徒外，原來佢同晚宴搞手之一嘅鄭裕彤新抱鄭家成太太李倩琦（小圖）有交情。
