23歲港男冠軍黃長發搭上39歲富商三奶李姿霆（Karen ）成為近日城中熱話，Karen 的情史也越揭越多，繼她先後被傳與伍思凱及導演錢永強等圈中人拍過拖後，一直反對女兒與黃長發拍拖的Karen 父親，昨日趁情人節向二人送上「大禮」，大爆女兒昔日感情生活多姿多采，男友「10圍枱仲要加凳都唔夠坐」，為棒打鴛鴦弄至父女反目成仇。
與富商育有一5歲女兒的Karen ，與年輕16載的黃長發譜出的一段姊弟戀，不但不獲雙方家人接受，而且Karen 父親李先生更因此與女兒反目，雙方關係惡劣得一發不可收拾。昨日，Karen 父親主動約見本報記者，於其黃埔物業接受訪問，其間李父頻頻斥責女兒與黃長發的不是，李父說：「Karen 同黃長發由（去年）12月6日相識，到22日拍拖，只係短短嘅16日，佢能夠當晒我哋成家人係仇人，教到佢咁樣真係非常離譜，佢哋呢段姊弟戀已經影響咗5、6個家庭。」
Karen 爸爸昨日主動聯絡本報「爆大鑊」，但他不願以真面目曝光。
黃長發與Karen 爆發姊弟戀，更為愛退出娛樂圈，惹來不少迴響。
寫「對唔住」求老公原諒
李父昨日提供Karen 年輕時的照片，確是青春可人，難怪其父指她男友多到「10圍枱加凳都唔夠坐」。
李父表示，今次事件無疑令一家人的裂縫加深，但自己仍堅持開腔，他說：「我哋出發點係想掹番個女，唔好俾人呃，因為佢哋年紀相差太遠，難聽啲講句真係做得佢阿媽，市面上根本冇人睇好佢。自從我哋12月尾喺澳洲旅行返嚟之後，屋企未曾有一日安寧，日日都嘈大交，就算返屋企見到面都冇嘢講，呢個黃長發真係搞到非常離譜。」Karen 日前曾透露其富商「老公」曾跪地求她不要走，但李父指事實剛剛相反，他說：「佢同人講話佢老公叫佢咪走，呢件事我相信冇發生過，初初佢老公都唔知道呢件事，直到睇到Karen 本日記先知道。我曾經聽過Karen 搵咗兩個女朋友，幫佢打畀佢老公，叫佢原諒佢，畀多次機會佢，佢仲寫過100次對唔住畀佢老公添。不過件事搞成咁，睇怕都冇得掹。」據悉曾在藝能任秘書及劉德華Fan Club 工作的Karen 昔日與不少圈中人拍拖，對此李父未有正面回應，但就承認女兒感情生活多姿多采，他說：「以前佢有個朋友嘅爸爸喺蘭桂坊開酒吧，同喺藝能做嘢無關，佢真係好鍾意去玩，佢雖然係我個女，但係都好離譜，真係多到一籮籮（男友），我個女有好多男朋友，有啲人哋追佢，有啲佢主動追人，啲男友多到10圍枱仲要加凳都唔夠坐，但係我從來都冇反對過佢拍拖，就算佢做人哋三奶都好，我都冇反對，因為我覺得呢啲係仔女自己嘅事，好同唔好我都唔會畀意見，但係今次因為太離譜，所以真係要出聲。」
李父每月收八千家用
對於有人認為李父反對女兒與黃長發拍拖無非因為「錢作怪」，李父斷然否認說：「我哋行到呢一步都係好迫於無奈，好似將屋企醜事揚晒出嚟，我哋唔係為錢，我個女每個月係有畀八千蚊家用，但係全部用番晒喺BB 身上，佢老公農曆年係有畀錢我哋，不過都係交畀我個女，再由個女決定畀幾多錢，我冇嗱佢老公嘅錢使過，佢畀錢Karen 同BB 用係岩，佢試過畀二萬蚊我，但係我都畀返佢。」李父又說：「我個仔都有勸過我，如果咁做會冇彎轉，我只係將事實講出嚟，岩同唔岩都唔係由我講，但係明知人哋有男朋友，點解仲要喺度撩事鬥非？佢（Karen ）成日話唔開心，佢早知人哋有二奶有大婆，識佢老公過陣都知佢年紀大，你同人哋生女？如果感情有問題咪走得瀟灑啲，點解搞到咁？我唔係幫邊個，但係做乜搞到咁要陀累屋企人？日後再見亦是朋友嘛。」記者曾致電Karen 及黃長發，但一直未獲回覆。採訪：何慧斯 攝影：仇志德
相士話：男嫩女熟互補長短
黃長發與富商三奶Karen 發展忘年戀，外間均不予看好，但從相學而言，兩人卻是頗相襯，玄學家林炳南說：「黃長發條眉係重疊眉，比較雜亂，適宜配年紀較大嘅伴侶，女方照顧到佢之餘，仲可以幫佢打點一切。至於個女嘅額角骨有少少凸起，代表佢鍾意咗一個男人之後會全情去愛，除非對方唔要佢。」林炳南補充謂由於Karen 相格現媚態，故經常吸引比她年輕的異性，且要到43歲之後桃花才減弱。從命格而言，林炳南指黃長發屬「印旺財絕」，為人貪玩，桃花重，與之相處，伴侶會較辛苦。故黃長發若想與Karen 長久，宜聚少離多，或36歲後才考慮結婚。
娛樂資料庫：兩代衝突事必有因
現年23歲的黃長發戀上39歲的Karen ，掀起不少風雨，Karen 父親昨日發炮，父女衝突浮面。其實圈中兩代反目之事屢見不鮮，大多皆因錢作怪。Rosemary 與母Julie （左圖）名模Rosemary14歲出道以來，一直由母親Julie 任經理人及掌財政大權。無奈Rosemary 戀愛大過天，Julie 即多次棒打鴛鴦，更經濟封鎖，Rosemary 不滿母親事事管束，與之決裂。蔡少芬與母黃素梅蔡少芬與兄長由母親黃素梅一手湊大，無奈母親嗜賭，欠債纍纍。00年5月，為母
債千萬的蔡少芬宣佈與母脫離關係，更哭訴因對方欠債而受滋擾。近年母女已恢復來往。鄧兆尊與母洪金梅（右圖）名伶新馬師曾97年逝世，遺孀祥嫂洪金梅與四名兒女包括鄧兆尊等因遺產分配問題對簿公堂。06年，法庭裁定祥嫂敗訴，並須交出祥藝所有股份及其他多項利益，估計約值3,000萬。近年雙方關係開始改善。錢慧儀與父錢志強大生銀行後人馬清揚之妻錢慧儀，與父於94年合資購下嘉兆臺一單位，後因出售問題致反目。98年，錢父跪在女兒位於山頂住所門外，要求她退還150萬元首期。99年，錢慧儀直認因父母貪財而再無聯絡。資料來源：《蘋果》資料
黃長發與Karen 的姊弟戀近日成為全城熱話，但Karen 爸爸表示從未見過黃長發。資料圖片
http://appledaily.atnext. ... art_id=12207851
