初九，吳亭欣聯同好友莊思敏過澳門出席春茗團拜，先在抽獎環節各贏現金獎，二人當場拆利是，前者贏二千，後者贏三千，大發新年財。
亞視獲台灣富商蔡衍明入股注資十億，但高層架構變動未定，更遑論製作；無工開，曾獲亞視執行主席張永霖公開力挺的吳亭欣亦要坐冷板櫈。新春期間前往澳門出席春茗的她，坦言自己零工作量，更自嘲要到賭場做兼職派牌幫補生活費，「有萬幾蚊收入，好過無嘢做。」
胡楓突然拉吳亭欣出舞池表演。二人先跳了幾下Cha Cha ，然後再跟胡楓合唱懷舊歌，雖然有魏秋樺從旁教路，不過唔屬唱家班的吳亭欣依然甩嘴。
在賭廳負責人阮玉榮教路下，吳亭欣跟莊思敏（左一）連贏多鋪，唔夠半個鐘，每人各贏兩萬，好過執。
吳亭欣一月出席亞視新春節目《新春金牛行大運》，據知無騷計屬義演，不過她依然扮得靚靚撐公司場。（《蘋果日報》圖片）
快斬兩萬
上週二（二月三日）年初九，吳亭欣應澳門賭廳廳主邀請出席春茗，被相士預言會斬斷爛桃花，今年轉好運的她，在抽獎環節中抽到二千元利是，好友莊思敏亦抽中三千，二人齊發新年財。開席後，吳亭欣被表演嘉賓胡楓拉出舞池大跳Cha Cha ，雖然臨時拉伕，毫無準備的吳亭欣仍執生跟著一班表演嘉賓又唱又跳。飯後，她又聯同莊思敏以及魏秋樺直落殺入賭場試手氣，在高人指點下，唔夠半個鐘，再斬兩萬元，十分盡興。
財星高照，不過已經個多月未有工開的吳亭欣居安思危，笑住話要搵兼職：「澳門班朋友話響賭場做派牌都有萬幾蚊一個月，佢哋話請我冇問題，如果每個月有萬幾蚊幫補吓，梗係好過冇嘢做。佢哋仲話做PR 有十幾萬一個月，都唔知係咪真嘅。」
據知演出新春節目的藝人，只有司儀有騷錢，所以袁文傑（左一）、萬綺雯（左二）、陳啟泰（右三）以及朱慧珊（右二）都有酬勞，不過扮《春牛圖》的牧童秦啟維就得個做字。（《蘋果日報》圖片）
張永霖入亞視後，人氣勁升，身為主席的他，早前就率領一班藝人林韋辰、呂晶晶、珈潁以及袁文傑到維園練跑，宣傳伎倆跟無線總經理陳志雲有得揮。（《蘋果日報》圖片）
去年亞姐總決賽，張文慈賣大包以低胸超短裙表演，對亞視忠心耿耿的她，卻未有出席今年「just for fun 」的賀年節目。（《蘋果日報》圖片）
免費做騷
搵到新水喉，但亞視執行主席張永霖揚言若果管理不善，公司一樣會執笠外，亦厲行緊縮政策，今個農曆年，就以「just for fun 」為藉口，叫藝人唔收錢出席賀年騷，效忠亞視多年的張文慈於是唔見影，而去年年底已經爆騷的吳亭欣，則以「義工」身份現身。
「我以為有新股東加入，應該好快會有嘢做，點知到而家都未有聲氣話會開劇，淨係知道三月會同張生（永霖）做《張永霖會客室》。其實亞視啱啱有十億新資金，應該有錢做製作，唔知點解到而家都冇嘢搞；我都唔明點解公司咁多年來可以蝕咁多錢，不過呢啲都唔係我哋可以理解到。」
