倪太周慧敏（Vivian ）日前去完尼泊爾探訪之後就唔舒服，仲係咁肚瀉，一臉病容嘅佢噚日就現身商台分享呢次探訪之旅，馮仁昭就好明顯見Vivian 消瘦咗不少，而同佢一齊去嘅張敬軒同蔡卓妍都齊齊病倒，認真唔吉利。
倪震乍聞張茆（小圖）嘅大名，馬上登車速逃。
周慧敏噚日喺商台宣傳尼泊爾之旅，但佢一臉病容，消瘦不少。
老婆肚屙30次
原來Vivian 喺尼泊爾時已經發燒不適，仲肚屙成30次，最慘係連肚皮都敏感生紅點，至於老公倪震有冇悉心照顧時，佢就話：「我都唔係好食到嘢，貓仔又病咗，而家好多嘢都係靠佢一個搞掂晒。」對於無線處境劇《畢打自己人》將倪震嘅偷食事件擺上枱，仲影射二人引咎離婚時，Vivian 就話：「我冇睇，呢啲我唔想知，亦都唔會回應。」Vivian 護夫心切唔肯重提老公嘅新聞，而倪震亦同樣好合拍地封嘴唔提被佢啜爆嘅城大女生張茆，噚日凌晨倪震就充當咕哩喺佢自資開嘅桌球室擔擔抬抬，雖然佢見到記者時就任影唔嬲，提到愛妻生病時亦有問有答，但當一問到仲有冇聯絡舊相好張茆時，佢就如中死穴封嘴話：「呢啲嘢唔講啦。」
倪震噚日凌晨現身桌球室執拾物品，心情勁靚。
from
http://appledaily.atnext. ... art_id=12193412
