唔知幾時開始，「港女」變成貪慕虛榮、刻薄勢利、橫蠻無理代名詞，其實香港女性都唔係通通如此，難得仲有人想做港女。金像影后周迅舊年透過入境事務處「優才計劃」申請做香港人，最近終於獲批，1月底嗱到香港身份證，正式成為港女。
香港身份證方便工作
周迅噚日話嗱香港身份證係工作需要，日後佢仍然會以內地為基地，工作重心仍會放在內地，佢正拍攝電影《風聲》，飾演軍機處譯電科人員顧曉夢，雖然片約不斷，不過佢話最想做歌星，「最近想唱歌的慾望非常強烈。」周迅去年中入表申請做港人，因為唔少工作都喺香港做，有香港身份證方便啲，加上佢06年憑電影《如果．愛》勇奪香港三料影后，所以可以輕易通過「成就計分制」獲接納申請。好多國內名人，好似李雲迪、郎朗、李小雙、湯唯、胡軍、章子怡同李寧等，都係循此途徑嗱到香港身份證。國內演藝界人士熱衷嗱香港身份證，除咗方便來港工作，有人指亦因為持特區護照可以免簽證到多個國家，亦係吸引佢哋做香港人原因。此外，稅務安排亦係誘因，有會計師同八方講，如果識得做恰當嘅稅務安排，做香港人可以慳番唔少稅款，所以話呢，做「港女」都未必係壞事嚟㗎。除咗明星，其實國內好多專業人士透過優才計劃申請來港，當中以金融會計、資訊科技、電訊、商業貿易等最多，知名度亦唔係唯一計分準則，有專業技能同證明適合香港發展，亦可循「綜合計分制」申請。
優才計劃申請增126%
過去兩年多咗人以優才計劃申請做香港人，去年申請達1,317宗，較07年增加126%，而獲入境處批准嘅個案亦急升116%達404個。至於申請數字會否受金融海嘯影響，暫時係未知之數，而據有關方面評估，由於香港人力市場萎縮，好多打工仔減薪、失業，反觀內地經濟受金融海嘯打擊較少，相信優才擇木而棲，目前會傾向留在內地發展，反而投資移民申請個案變化可能較明顯，不過截至去年底都未見減少，去年共收到逾6,000宗申請，數字同07年差唔多。mailto:pf_lee@appledaily.com
設計圖片
http://appledaily.atnext. ... art_id=12179485
