兩年前已回復單身的洪子晴，雖然仍未有新男友，但她坦言不乏人追，情人節還未到，已經有「十隻手指都數唔晒」的男士約會她。問她如何選擇？洪子晴講到明要睇誠意，「最早打嚟約當然係最有誠意啦！」至於點樣安排情人節才能冧到對方？身經百戰的洪子晴即刻過你兩招。
浪漫晚餐
晚餐的地點，洪子晴堅持要望到海，法國菜絕對是不二之選。洪子晴說，一頓浪漫的晚餐，香檳一定少不了，旁邊有小提琴伴奏的話，那就更加好。
情人節晚餐：$788 一位
Hermes 皮帶$5,500
Diabolo de Cartier 鑲藍寶原子筆$2,500
名牌禮物
送給男士的禮物，她說一定要名牌，但就以實用為主，例如皮帶或筆，「腰帶有種意義係縛住男人，牌子鍾意Hermes ，夠名貴；筆就會揀Cartier ，要鑲鑽石，對方可以用嚟簽約、又可以寫情信俾我。」
揀吊帶裙
洪子晴話約會時最好挑吊帶裙，既可配合餐廳的環境，亦代表你尊重約會，更重要是低胸晚裝裙更能凸顯女性優美的體態，令對方暈得一陣陣。
BCBG 低胸裙$3,600
製造驚喜
她提議男士不妨將花放在車尾箱，製造突如其來的驚喜；九十九枝香檳玫瑰，是指定動作。
漫步沙灘
洪子晴喜歡浪漫，飯後節目，她會選擇在沙灘漫步，「我會揀去淺水灣，兩個人靜靜哋望住個海，聽吓浪聲，好正。」
洪子晴認為一定要男生主動先送禮物，因為代表著他的誠意，而她最心儀的禮物，就是新款的名牌手袋。
Chanel 2.55 手袋$26,800
多人追
在新加坡居住了七年的洪子晴，回歸香港ball 場兼回復單身，正忙於國內投資地產及電訊生意，同時亦開始其慈善工作，忙到不可開交，她笑笑口說：「邊有時間拍拖？」雖然暫時冇情人，但提到情人節，洪子晴卻表示大把選擇，當中不乏青年才俊，「嘩！都多人約㗎，不過要揀選過，而家入圍嘅人數十個之內。」至於入選的條件，她明言要「單身、年紀又young 」先會加分。
男約女出街要睇誠意，那麼女生又怎樣做才能「吸引」到心儀的男性約會她？洪子晴講述自身的經驗，「上次返國內災區起學校，當中一個四十歲男士幾高大靚仔，幫屋企做生意，佢同我講好少見到咁後生嘅女仔做呢啲嘢，以為我未結婚，屋企好有錢，啱啱響外國讀完書，因為佢覺得我好高雅大方。」已經卅九歲、但仍被誤作少女的她開心地續說：「所以女仔俾男仔嘅第一個印象好重要，平時言行舉止、談吐，你有冇料，人哋一眼就睇得出。可能唔使等你開口，人哋已經打嚟約你。」
情人節當晚的晚餐亦是重要一環，從食物上的選擇，可以顯示女性細心的一面，「例如揀啲男仔平時鍾意食嘅嘢、又或者每道菜都係嚟自世界各地嘅特色食物，一定要響食物上花心思。」
她說女生約會時，可揀魚作主菜，「可以食得斯文。」
甜品一定要心形兼細細件，容易入口。
海中浪漫
至於她最難忘的一個情人節，就要數到十八歲那年，當時她有個地產商男友，一追便追了她兩年，每一日都會跟她說「我愛你」，情人節時更做盡一切她認為浪漫的事，回想起她仍一臉甜絲絲，「佢揸咗隻遊艇去到一個島，我話好攰，佢就孭我，一路孭到海灘，兩個坐響石上望住個海，之後佢揸隻船去避風塘，點情歌俾我聽，嘩！我真係覺得好正、好浪漫！」
節目夠浪漫，禮物當然唔少得，她那位地產商男友絕對是重錘出擊，「佢送咗份好厚好厚嘅禮物，係一間淺水灣嘅樓，二千萬。但係我拒絕咗，因為我唔係佢太太，冇理由收呢份禮物。」禮尚往來，洪子晴出手亦不輕，她送了一隻六萬元的一卡鑽石戒指給男友，「因為覺得鑽石代表
久堅貞，我又覺得佢為我付出咁多，咁俾番啲回報佢啦，哈哈！」
此外，與第二個男友過的情人節亦叫她難忘，「佢係唱片公司老闆L 君，嗰日佢親自落廚，煮咗兩塊心形牛扒，從來都冇試過有男人咁做。」
男方懂得製造驚喜，女方亦要有心思，例如送隻捧著紅心，或寫有「I Love You 」字句的毛公仔，可冧得對方好開心。
她與前夫李家松九二年結婚，婚姻維持十五年告終，育有兩個兒子。
嫁錯郎
雖然過了兩次浪漫而難忘的情人節，但洪子晴最後卻跟最不浪漫的博愛前主席李家松結婚，可惜最後還是離婚收場。她似是有感而發說女生最緊要實際，不要一味得個「冧」字，被男生的甜言蜜語欺騙，選男友最重要大方，「女仔最驚嫁錯郎，就算嫁咗一個男人十五年，佢都會同你計，新加坡會所用嘅十八個半都搵秘書send 番張單俾你；投資、買樓、買馬，都要老婆出一半錢，呢啲就真係死得啦。」
跌過一交，令洪子晴選對象要求特別嚴謹，就連她自己都說要求太高，「我要個男人好乾淨、有愛心、有知識、智慧、有內涵、有上進心、責任感、有啲高大靚仔、幽默感、會做運動……當然單身係最重要。」呢種男人，去邊度搵呢？
名人情人
一般人過情人節，不外乎收花、燭光晚餐，上流人的情人節，又會唔會比較特別？
趙式平 送暖
和法籍男友Fred 拍拖年多的趙式平，想和男友去歐洲過情人節，「歐洲情調好，氣氛好。」她亦已猜到男友一定送玫瑰花，「法國人好浪漫，佢一定會mix 唔同顏色嘅玫瑰花送俾我。」她今年就想織冷帽送給男友，「唔想送響街買到嘅禮物，要make effort 。」
四太 又係肉嘴
問四太今年情人節想收什麼？何太繼續想將何鴻燊的肉嘴私有化，她笑話：「年年一樣，何生錫一啖，送佢嘅肉嘴就最好！」咁何生好潤定雙唇。
戴凱欣 私相簿
拍拖四個月的四洲太子女戴凱欣，沒想過要什麼禮物，「同鍾意的人一起食個舒服嘅飯已經開心。」她不要求男朋友花心思，自己卻會做本相簿，將他們過往一年的生活點滴放在相簿內，「我會一年做一本，不過我哋未夠一年，所以要下年先送。」
