洪子晴（原名洪芷晴）噚日喺中環為慈善唱片《Walk withLove》舉行記者會，佢以個人名義成立「洪子晴慈善基金」，會將唱片賣得嘅收益捐助慈善機構。活動有好多嘉賓撐場，除咗陶傑擔任司儀，仲有林利同胡渭康、蔡一智、白韻琴同魏秋樺等，連富商鄭裕彤都託人送獎金以示支持。洪子晴話同彤叔冇上契，大家只係友好關係。
送碟破冰39歲嘅洪子晴喺多年前捲入富豪旅行團懷疑放風者嘅是非中，當時劉鑾雄（大劉）懸紅百萬追尋某女子嘅壞新聞，問洪子晴會唔會送碟畀大劉順便破冰？佢話：「自己冇嘢，但冇見過面，以前係一場誤會，或者你哋幫我送。我希望人建立和諧社會，做錯乜都應該原諒人。」問洪子晴所指嘅係咪劉生，佢話：「所有人都會做錯事，唔只佢，誤會一場，當時唔了解件事。」追問佢係指佢本人定劉生唔了解件事？佢哈哈三聲之後話唔再講。另外，魏秋樺以大露背兼紫色T-back性感打扮撐場，佢話：「天氣太熱，32度至着到咁。」
