現年46歲嘅羅嘉良前年同34歲嘅內地女星蘇岩合作拍劇結緣，舊年7月佢宣佈同老婆方敏宜離婚，日前佢更傳出喜訊，年初五（上周五）嘉良同蘇岩更即興訂婚，年底就拉埋天窗，婚後會留喺北京居住。噚日準新郎嘉良返將軍澳電視廣播城拍《金錢誘罪》時，袁詠儀（靚靚）同馬德鐘一見佢就即刻上前恭喜，靚靚話：「唔怪得之成日靜雞雞行埋一邊講電話啦，之前問使唔使畀利是你，你又唔出聲！」一面甜絲絲嘅嘉良話：「我一向好低調，如果唔係傳媒收到風問我都唔會講，咁係開心事，問到咪認咋！我哋係拍咗拖一段時間。先訂婚後結婚，係因為覺得訂婚好浪漫，而家諗緊可能會喺北京擺酒，等拍埋呢套劇，我就會搬返去北京住。」
嘉良被問到未婚妻蘇岩係咪破壞佢同前妻婚姻嘅第三者，佢噚日極力否認。
內地女星蘇岩同嘉良因為合作劇集《完美結局》，擦出愛火花。 《新浪娛樂》圖片
蘇岩唔係第三者
問嘉良蘇岩係咪破壞佢同方敏宜婚姻嘅第三者，佢話：「唔係，冇大家諗嘅事發生。我訂婚，已經通知咗前妻同個仔。」靚靚衷心祝福一對準新人，佢話：「嘉良係好男人，希望佢可以得到幸福。」至於嘉良嘅紅顏知己宣萱因為唔喺香港，所以未能聯絡上，唔知佢知道嘉良嘅喜訊之後，會唔會高呼甩難呢？
羅嘉良同未婚妻蘇岩已定咗年底結婚，更會喺北京擺酒。
http://appledaily.atnext. ... art_id=12162231
