上週六（31 日）《飛》劇響電視城拍攝凌空抱起黃德斌吊威呀戲，原定一日拍完，最後拍咗兩日，即係又用多咗一日錢，希望蔡少芬打大心口有助收視。
台慶劇《珠光寶氣》開拍以來巴巴閉，出盡小生花旦、遊艇靚跑兼青島、西藏、法國外景，八十集豪門恩怨擺明傾盡人力財力。首播當日仲有黎姿自爆退出娛樂圈，咁多元素幫手催谷。首集高開收視36 點，可惜之後無以為繼，谷底試過23 點好慘烈。收視低難交代，最慘金牌監製戚其義拍攝《珠光寶氣》使大咗，緊接開拍新劇《飛女正傳》要狂縮皮，既取消海南島外景，連飛女蔡少芬吊威呀都要慳住吊，搞到撼親頭，蔡少芬呢個「飛女」都幾惡撈。
由高峰插水
金牌監製戚其義一向深得珍姐（無線戲劇分部副總監曾勵珍）重用，一向好大喜功，以往開拍的《天地男兒》、《創世紀》都係無線重本製作，03 年《金枝慾孽》更贏盡收視同口碑。之後無以為繼，收視一套差過一套。其中80 集長劇，收視更慘不忍睹，最低試過23 點，而家套劇播到尾段平均收視都係得25 點，真係令人擔心！
04 年《金枝慾孽》
由鄧萃雯、黎姿、張可頤、佘詩曼等主演，講述宮廷內的明爭暗鬥，雖然鄧萃雯飾演如玥一角夠搶，但最後視后都係被黎姿奪得。
最高收視：41 點
最低收視：30 點
06 年《火舞黃沙》
《金》劇班底製作，初時被寄予厚望，可惜被觀眾批評女角個個似黃面婆，令收視急跌，好彩結局撐得住最高收視38 點。
最高收視：38 點
最低收視：27 點
06 年《CIB 刑事情報科》
得林保怡、王喜孭飛玩《無間道》feel 警匪格局，觀眾唔係好受落，不過收視都叫站得住，未致於失威。
最高收視：36 點
最低收視：28 點
08 、09 年《珠光寶氣》
有強勁《火舞黃沙》班底，再加埋《家好》班底李司棋，鍾嘉欣，黃宗澤，又遠赴法國，西藏拍攝，遊艇，跑車乜富貴道具出齊，但收視冇乜突破。
最高收視：36 點
最低收視：23 點
戚其義對舊愛邵美琪十分寵愛，有劇開實預佢，不過今次《飛》劇就冇用佢。
撼傷頭 雖然套劇縮皮，不過Ada 都冇欺場，仲試過拍威呀戲撞傷額頭，嚇死老公張晉。《壹週刊》圖片
過大海 《飛》劇原定去海南島、中山，不過縮皮改咗去澳門，好彩有金都酒店贊助住宿，戚監製又慳一筆。《忽然1 周》圖片
《珠光寶氣》雖有MaBelle 贊助，但由於要扮上流社會玩高檔，開支大大超出預算，「單係租車都有排計啦，次次都借林寶堅尼、法拉利，拍食法國餐又真係去法國餐廳買返嚟，拍大場面又鍾意用過百老臨。想唔over 都幾難。」一名場務透露。
縮皮製作
玩到咁大但係收視又唔見特別標青，結果戚其義新劇《飛女正傳》慘被無線閂水喉，套劇原本打算去海南島同中山取景，不過如今冇錢出埠，連原本話贊助的雅居樂亦突然縮沙，搞到連中山都去唔成，最後要由監製出面找曾贊助《珠光寶氣》的相熟澳門金都酒店贊助住宿，大隊先有機會往澳門取景，最當殃的是扮飛女的主角蔡少芬除節省成本減少租外景場地吊威呀，仲要連武師錢都慳埋，隨便搵幾個導演幫手拉威呀，難怪發生蔡少芬撼頭事件。不過對於縮皮一事，戚監製就死撐：「冇錢我就唔拍《飛女》啦，拍跑女啦！係咪？」
是但拉
拉威呀嘅武師要成千蚊一日，戚監製為慳錢就試過搵導演幫手拉，認真精打細算，好彩上個禮拜都搵番武師（小圖）拉。
演員呆等
除縮皮外，《飛》劇經常出現「飛紙仔」情況，搞到所有演員都要提早開廠等劇本。戚其義直認不諱：「演員係辛苦，但製作上你哋好多嘢唔明白，呢個係最好嘅解決方法。」而戚其義愛將陳豪亦承認拍得辛苦：「我唔係第一日開佢工，呢個係佢嘅特色，但係拍劇辛苦就一定㗎啦！」
上位監製
連仆幾套戚其義金牌監製個名危危乎，有人out ，亦有人上位，其中以張乾文呢位監製最鍾意刀仔鋸大樹兼有收視保證，代表作就有《古靈精探》，得郭羨妮、郭晉安、馬國明撐住，一樣有40 點收視，拍得往《家好月圓》㗎！
梁家樹派 莊偉健
新作有《金錢誘罪》拍攝中，賣點係影射新鴻基郭氏家族。呂良偉、戚美珍復出之作，擺明賣老戲骨。
張乾文
新作《絕代商嬌》（原名《企業醫生》）賣點有黃子華個人表演，再加埋視后佘詩曼。
曾勵珍派 劉家豪
新作有《唐伯虎點秋香》賣點係陳豪，阿卡再上身引你笑。
梅小青
老公劉家豪威威，梅小青今年重頭劇《宮心計》，阿佘、鄭嘉穎呢對緋聞情侶夠睇頭，仲有《家好》陳豪、楊怡助陣。
