吳君如向來口沒遮攔，新春期間依然把口唔收辣火頭。前晚商台播出君如主持的錄音節目，她竟口出狂言，侮辱有亞洲飛人之稱的欄王劉翔「食咗屎」，雖然她即時道歉，但態度輕佻，嘉賓谷德昭惟有幫她狂兜補鑊，就連商台的網上版昨也一度剪走君如衰多口言論。不過陳可辛就力撐女友君如冇失言：「佢嘅節目一向都嬉笑怒罵，講笑都唔講得？」
欄王劉翔去年因腳傷忍痛退出北京奧運，令全球華人心痛不已，此事對劉翔也造成重大打擊，幸好他赴美求醫後已逐漸康復。不過，一向口不擇言的吳君如前晚在錄播的商台節目《嘩！嘩！嘩！打到嚟2009》中，居然以劉翔因傷退賽一事搞氣氛，指他當日不知是否「食咗屎」，此話一出當堂嚇窒在場其他主持和嘉賓谷德昭。
陳可辛和吳君如一向十分恩愛，難怪他愛女友心切表現如此激動。資料圖片
谷德昭在訪問中聽到吳君如侮辱劉翔的一番話，即時被嚇窒。資料圖片
氣氛尷尬谷德昭慌忙補鑊
前晚商台播出吳君如訪問肥谷的一集，甫開始肥谷向聽眾拜年，他說：「恭喜發財，我希望大家正如劉翔所講，日日好心情啦，冇好心情乜都做唔到。」吳君如聞言竟說：「咁佢（指劉翔）過日跑係咪食咗屎呢？」肥谷及另外兩位主持聞言即笑了起來，但緊接為君如補鑊說：「佢腳痛呀！」君如便連聲說：「Sorry ，sorry ，我唔應該侮辱呢個國寶。」之後又打了個哈哈，但語氣輕佻，誠意欠奉，肥谷遂笑罵她：「想死呀？」君如即笑道：「
口水再講過，佢過日係咪心情唔好呀？」肥谷順勢說：「佢過日一定係心情好大壓力，成年佢都係緊繃繃。」君如不住說：「係呀、係呀。」之後急急打圓場說：「好啦，我哋今晚唔好講呢啲嘢。」肥谷也附和道:「我哋唔好講劉翔住。」乘機改變話題。由於君如農曆新年放假外遊，所以其主持的商台節目皆錄音播出。不過商台並沒有刪剪君如這番話便將原裝版本播出，昨午3時許商台網頁就曾一度播出刪剪了君如衰多口的版本，至5時許又戲劇性地播回原裝版。昨日記者聯絡君如，其助手表示君如不在港，但已傳了短訊給她，至截稿仍未有回覆。其後記者致電君如男友陳可辛，欲問他對君如口快快侮辱劉翔的言論有何看法，豈料他在電話中顯得十分勞氣，並力撐她說：「我都有聽佢個節目，佢都唔係咁嘅意思，佢個節目係嬉笑怒罵，講吓笑都唔得？咁點做呀！個節目係佢，關我乜嘢事呀？你哋問都應該係問佢唔係問我。」
吳君如、王貽興（右）及阮子健拍檔主持《嘩！嘩！嘩！打到嚟》，但王貽興自稱已不記得當晚內容。資料圖片
劉翔當日因傷退出北京奧運，令全球華人心碎。
拍檔封口王貽興極速失憶
當日有份主持的王貽興，昨日在電話中對於君如揶揄劉翔的說話竟稱沒印象，王貽興說：「新年前我哋趕錄咗好多集節目，內容都唔係好記得。」提到吳君如失言，他說：「我諗君如一定唔係有心咁講，熟悉佢性格都知佢鍾意講笑，佢都成日鬧我蛋散，唔通我真係咩，其實都唔係好大件事。」谷德昭則說：「我都唔係好記得個內容，但大家要有幽默感，唔好咁認真，佢一定係講笑。三姑（吳君如）最搞笑係為人口快快，大家千祈咪搞到佢。」商台對外事務部昨則回應：「未收到投訴，佢係用廣東人俗語嚟形容問佢係咪心情唔好，而且佢怕被誤會已作出道歉同更正。」再問到為何在網頁上先後播出刪剪和原裝版本，商台表示已就事件作出回應，不作任何補充。採訪：何慧斯、李珮洳
得罪人多：爆曾華倩性事搵食
吳君如向以「敢言」見稱，經常衝口而出，如曾寸《勁歌》頒獎禮主持人服裝似夜總會，結果遭曾志偉狂寸，還試過爆老死曾華倩性事博宣傳。曾華倩（圖）01年君如演出棟篤笑《兩篤笑》期間大爆老友曾華倩性事：「女仔通常好怕醜，多數瞌埋眼做，曾華倩好啲，因為佢會擘大眼，但戴住黑超！」事後更揚言如朋友致電罵她就會還擊：「我嗱（朋友）個名嚟搵吓食之嘛。」白韻琴白韻琴表示有次與君如到巴黎，當時白姐姐帶著一套LV 行李篋晒冷，結果被盜，錯失欣賞音樂劇《紅磨坊》的機會，君如竟寸她謂：「抵死！冇得去！」曾志偉02年君如在節目上大彈《勁歌》頒獎禮主持人服飾「bad taste 」、「丟架」，十足夜總會服飾，《勁歌》主持曾志偉反寸謂：「君如唔好以為嗱過最佳服裝獎，就真係以為自己好有taste 先得㗎！」朱茵朱茵早前在《志雲飯局》大爆捉姦痛史，其後君如現身同一節目時就寸朱茵說：「我真係冇嘢爆，感情都可能會出現第三者、有波折，不過真係冇捉姦在床！」資料來源：《蘋果》資料室
禍從口出：森美阮小儀失言公開道歉
吳君如前晚在節目中竟然拿國寶劉翔來開玩笑，令人嘩然，其實過往曾有不少DJ 在大氣電波中胡言亂語，結果掀起軒然大波。節目主持：森美、阮小儀（圖）經過：兩人於06年在商台節目《架勢堂》內發起主題為「我最想非禮嘅香港女藝人」的網上投票選舉，被指不尊重女性，連日遭婦女團體指摘，二人要公開道歉，又被停薪留職兩個月。節目主持：陳強經過：06年在其主持的商台節目《正義不正確》以手機外洩的「A 小姐」事件來開玩笑，被聽眾及藝人怒斥太過份及幸災樂禍。節目主持：李學斌經過：06年在新城節目《開心大鬧鐘》中討論本地孕婦上街抗議內地孕婦來港產子一事時，忽然爆出一句：「唔知呢班係真孕婦定假孕婦呢。」結果被網友聲討。資料來源：《蘋果》資料室
吳君如一向口沒遮攔，她在前晚播出的節目中竟開口侮辱劉翔。資料圖片
http://appledaily.atnext. ... art_id=12149430
