「吾優造」培訓計劃會同唔同行業嘅公司合作，由呢啲合作公司派員做培訓，主要針對該行業嘅工作性質，例如sales 就會教產品認識、包裝、執貨等知識。
時勢唔好，近排好多公司裁員，對一班年輕人嚟講，要搵工難上加難，好在坊間有唔少機構提供就業培訓服務給呢班年輕人，好似聖雅各福群會提供嘅「吾優造」培訓計劃，專門提供一條龍服務，為學員提供培訓、實習同埋搵工，聽落好似唔錯，我發錢韓就聯絡呢個計劃嘅項目發展經理Alan ，問吓參加呢個計劃有咩資格先。
Alan 話呢個計劃自沙士起開始提供服務，已經為超過2 百個年輕人搵到工做，「16 至24 歲嘅年輕人就可以參加，計劃主要分為4 個行業，包括銷售業、餐飲業、旅遊業同埋生態導賞員，每班15 人，前兩者冇學歷限制，而後兩者就要中五程度以上，事關想做導遊或者生態導賞員需要考牌，所以要有番少少學歷先得。」
G.O.D 東瀛遊實習
而培訓就分4 部分，第一部分係1 星期嘅基本培訓，主要教一嘅與人相處、溝通嘅技巧；跟住就係進入第二部分嘅2 星期行業培訓，由唔同行業嘅合作公司派員做培訓，主要針對該行業嘅工作性質，例如sales 就會教衣喺儀容、產品認識、包裝、執貨等；第三部分係學員會獲派到唔同嘅公司實習1 個月，例如銷售業有G.O.D 、旅遊業有東瀛遊、餐飲業就有富豪酒店等。完成實習後，最後會再有2 日技巧提升訓練，教吓大家見工面試技巧、點寫求職信同履歷等。
最正係個培訓唔單止免費，成功完成培訓之後，學員仲會有津貼添，Alan 話：「我哋呢個計劃得到賽馬會慈善信託基金贊助，凡係完成咗銷售業同餐飲業培訓嘅學員，就可以得到3 千蚊津貼，而旅遊業同生態導賞員因為我哋會資助佢哋考牌，所以津貼就少嘅，得1 千蚊。」除咗有津貼之外，聖雅各福群會仲會幫嘅學員搵工添，「如果學員喺實習機構做得好，通常僱主都會直接請佢哋，如果學員上完training 覺得個行業唔岩自己，例如佢讀完旅遊業，但係想做文員，我哋會幫佢聯絡其他公司，盡量安排面試機會，每次培訓之後，我哋都會有7 成學員可以成功就業。」
岩岩夠18 歲、喺上年9 月參加銷售業培訓嘅家俊，現時喺利豐集團旗下時裝店做兼職sales ，時薪約$30 ，月入有6 千幾蚊，過埋農曆年就會轉為全職，到時底薪有7 千，另外會有佣金同其他福利。「我中五畢業後，好想搵份sales 工做，但自己嗰陣未夠18 歲，去到好多鋪頭見工，未填form 就叫我走，嗰刻覺得搵工好難好灰心。之後經朋友嘅介紹下，參加咗呢個計劃，我被派去lesportsac 旗下鞋店做實習，做完公司真係肯請番我，不過我想試吓去其他公司做嘢，聖雅各好快就幫我搵到呢份工。」銷售業、餐飲業及旅遊業嘅課程喺嚟緊嘅2 月同5 月開班，想學番一技之長嘅年輕人唔好錯過喇！
開課日期
銷售業：2 月16 日
餐飲業及旅遊業：暫定5 月
查詢電話：3583 3307 / 3583 3307
網址：
http://www.sjsys.org/ep
Profile
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。
撰文、攝影：發錢韓
