呂慧儀（紅頭盔）與好友陳君宜一落賽道即互相左穿右插，開行turbo 鍊過，更不時玩甩尾，手車辣過唔少男士。
○六年港姐呂慧儀，去年憑住「謎女郎」及「長腳蟹」開始為人熟識，卻因高調撐男友黃文迪（Dickson ）選港男而辣興高層，為保事業，月前她忍痛將六年感情斬纜，聽話搏翻身！
無拖拍，呂慧儀轉口味尋刺激，孖住徐子淇密友陳君宜，個個星期到小型賽車場練車玩飄移，甚至向好友借二百萬法拉利，部署參加慈善表演賽。
陳君宜（左）有過億身家炒樓富商男友鄭躬明，平時揸住價值二百萬的法拉利F430 出入，更唔介意借俾好友呂慧儀練車。
呂慧儀為療情傷，每星期都約朋友到龍鼓灘小型賽車場學飄移，為日後參加慈善表演賽做準備。
甩拖玩車
去年與港男黃文迪（Dickson ）的戀情浮面後，呂慧儀即被無線投閒置散，無劇拍，更被安排在東華騷做人肉布景板，貶為三打七。唔想無得撈，月前雙方協議分手，六年情玩完。
感情事急凍，呂慧儀近日經常與有個過億身家男友鄭躬明的陳君宜（Qinnie ），同到小型賽車場學飄移。
「長腳蟹（呂慧儀花名）甩拖好唔開心，啲friend 咪抽多啲時間陪佢囉，佢本身好鍾意車，之前識咗個玩賽車嘅朋友話教佢飄移，咁啱Qinnie 又係同道，所以呢排個個禮拜都去鍊車。」知情者說。
呂慧儀（左一）跟陳君宜玩完小型賽車後，又走到附近的頒獎台嗱住獎杯影相，認真鬼馬。
上午揸完車，下午四點幾，呂慧儀又換上貼身褲高踭鞋去開工，做街頭訪問。
呂慧儀高調拍拖，早前被公司罰在《歡樂滿東華》做人肉布景，跟男友黃文迪齊在節目中做啦啦隊。
次次使過千
上週五（一月十六日）中午十二時，揸住紅色Jazz 的呂慧儀，與揸住二百萬法拉利的陳君宜，一同現身龍鼓灘「鑽石海岸小型賽車場」，二人與工作人員有講有笑非常熟落，明顯是熟客。上齊裝備，戴好頭盔，二人跳上小型賽車，在跑道左穿右插各不相讓，又不時玩甩尾。
從二人所駕的車款所見，屬初學者型號，車速最高是五、六十公里，但唔少一級方式程賽車手，都是由練習這類小型賽車起步。
「佢哋學飄移無耐，但好投入，就算每人玩十分鐘要二百幾蚊，但每次佢哋都練成個鐘，次次都要使千幾蚊，女仔嚟講，手車都算幾辣。」知情者說。
處於半退休狀態的陳君宜，不時跟富商男友鄭躬明出入ball 場。○七年十月二人孖住到四季酒店，出席徐子淇愛女李晞彤誕生八十日宴（發實宴）。（《蘋果日報》圖片）
模特兒出身的陳君宜，跟徐子淇屬好朋友，徐子淇懷第一胎時，陳君宜成日陪住出入。（《蘋果日報》圖片）
落場比賽
此外，呂慧儀亦不時借陳君宜的法拉利F430 過手癮，為日後參加慈善表演賽做準備。
「其實之前都有人搵佢參加呢類表演賽，Konnie （呂慧儀）都好想搵機會落場，試吓自己賽車嘅實力，不過，落場嘅事要交番俾公司決定。」
