全球金融海嘯下，匯豐控股（005）前晚在倫敦開市後，昨日凌晨股價一度跌至51元，令股民膽戰心驚，昨日該股在港開市一樣暴跌，最低見56.8元，收市價為57.5元。
香港娛樂圈有不少匯控捧場客，不少人因而坐艇，如在匯控140多元時買入的薛家燕，坦言身家唔見一半有多，陳豪和鄭嘉穎雖然同樣蝕錢，但二人勇者無懼，伺機趁低入貨，袁詠儀則於去年底以90幾元買入，昨日見該股跌破60元，還大膽買入溝貨，對這隻大藍籌仍然充滿信心。採訪：林妃、葉雪
陳豪：嚟緊會再買
《入市價約$100》「我100幾蚊時買入，目前都唔會放，我都唔會太擔心，都會擺喺度等吓，只係時間問題，嚟緊都會再買入，不過而家未係一個可以預測到嘅時候，我會再睇時間同機會。」
湯盈盈：唔知蝕幾多
《入市價約$120》「我90幾蚊過時入㗎，而家得番50幾，不過我都唔會去理，我之前120幾蚊時都有買，我都唔知損失幾多，不過我都唔會太擔心，咪放喺度咋。」
袁詠儀：宜長線投資
《入市價約$90》「匯控我喺90幾蚊買入，而家跌到咁低，今日我都喺60樓下入咗少少，今日就唔敢入太多貨，因為人哋話仲有得跌，所以我都係會分段入啲嚟溝貨，呢隻係大笨象股，作為長線投資，呢隻股始終值得買入。」
薛家燕：都係買樓好
《入市價約$140》「我喺匯控140蚊時入市，大約有7位數字，因為我自己買之外又買埋畀啲仔女，而家唔只冇咗一半，賬面真係跌好多，我都唔睇咁多住，放埋一邊先。不過而家跌到50幾，我個投資顧問話如果真係有多餘錢不妨趁低吸納，我都諗緊睇定啲先，因為始終有個價值，我有信心會回升番，好似一場遊戲咁，不過遲啲都係買樓好啲，起碼有實物揸手。」
鄭嘉穎：等再跌溝貨
《入市價約$58》「之前我買咗建設銀行（939）同工商銀行（1398）呢兩隻內地銀行股，反而冇買匯豐，但今日見匯豐跌到最低係50幾蚊，我即刻喺58蚊買入，以為價錢好抵啦，點知收市報57.5，而家只有等隻股跌到55蚊或者51蚊價再入市啦！」
曾華倩：係數字遊戲
《入市價約$100》「我係十年前買嘅，過時百幾喇！貪佢息口高，雖然佢而家跌，但我都唔擔心，只係賬面上嘅數字遊戲，如果啲錢唔等用咪放喺度，而且我又唔係買咗好多，始終匯豐銀行好穩陣，所以唔會真係好擔心，我都係想留畀個囝囝。」
麥玲玲：牛年要捱吓
「我走咗好耐，賺咗啲錢，而家睇準如果跌到55、56我就入市，噚日我睇住個市，到58蚊我會分段入市，而家匯豐個價係好吸引。農夫之前叫我喺78、79蚊同佢哋入市，不過我話有時忍吓手好啲，農夫一直叫我幫佢哋投資，舊年佢哋賺咗錢，我要好小心幫佢哋投資，3月匯豐公佈業績，不過長線發展應該冇問題，牛年大家要捱吓。」
雷頌德：逢跌必入貨
「我平時都唔識投資股票，不過都有買匯豐股票，而家真係好抵，你話半價買入幾抵。其實由高價時我都一直入貨，而家每次跌都會再不斷入貨，我睇好匯豐好快會升得番，不過我手持嘅股票唔會一升即放，會作中長線投資之用。」
石修：有實力股票
「我一直都有買匯豐銀行，之前都覺得佢好穩陣，而且而家都未到結數，所以冇去計損失幾多，佢點升點跌都係一隻有實力嘅股票，呢啲只係數字遊戲。」
左起：鄭嘉穎、湯盈盈、陳豪、薛家燕和麥玲玲等一班買入匯控股票的藝人，現在齊齊坐艇。設計圖片、設計對白from
http://appledaily.atnext. ... art_id=12114333
