宣稱擁有32D 、24、34魔鬼身材嘅楊謹華，拍過《白色巨塔》，專演狐狸精，今次從良改玩姊弟戀成功上位。
憑住《命中注定我愛你》紅爆港台嘅阮經天（小天），另一套新作《敗犬女王》呢個月4號喺台灣首播即壓贏《命中》嘅平均收視，達4.03（收視人數為256萬2千人），高踞台視榜No.1。
今次拍住阮經天做女主角嘅，就係有台灣「狐狸精」之稱、以前專做第三者角色嘅楊謹華（Cheryl ），仲同細佢7年嘅小天有場激烈床上戲。出道18年嘅楊謹華今次憑住《敗犬》成功反彈，hit 爆台視界。八八卦卦，乜嘢汁都撈嘅FBI 都有留意《敗》劇㗎，一睇就覺得楊謹華好似一個人，唔係「狐妮」呀，係近年香港難撈、北上大陸拍劇嘅關寶慧呀！唔少老友都同FBI 話楊謹華眼細細鼻又高又挺，加上經常做埋嘅姣女角色，真係有九成似關寶慧，大家覺得似唔似呢？
9成似台灣《蘋果日報》圖片
33歲楊謹華眼細細、面尖尖，鼻樑又高又挺，真係超似42歲關寶慧喎！不過關寶慧熟好多。
台灣《蘋果日報》圖片
嗒𡃁仔楊謹華話拍住細佢7年嘅小天合作愉快。梗係啦，有得「食」𡃁仔，當然開心囉！
