Edison 話退出娛樂圈、阿嬌復出無期；周慧敏就死要嫁賤震，港星個個唔爭氣，今年聖誕咪益咗一班抵食夾大件嘅台星囉。
數一數今年聖誕嚟香港掘金嘅台星就有阮經天、模范七棒、黑Girl 、林宥嘉，仲有S.H.E 同港人齊齊度過平安夜。
FBI 聽聞好似阮經天呢啲萬人迷級數嘅台星，其實只收5萬港紙一個騷，呢個價錢仲已經包埋最平三千蚊嘅來回香港至台北商務客位機票，稍為有名氣嘅香港歌星好似薛凱琪呀、何韻詩咁都係收5萬蚊一個聖誕騷喎，喂，金融海嘯改變晒香港人消費模式喎，何況台劇呀、星光幫、綜藝節目呢啲最近響香港咁hit ，本地幫真係唔怪得人。
好似阮經天響平安夜當日仲搞咗個「相約小天抱抱會」，嘉賓「E cup baby 」劉欣宜同上台嘅粉絲個個有得攬有得啜，有寫真送，E cup baby 仲送咗條紅「底」畀小天，「我睇報道話佢唔洗底褲，咪送畀佢囉。」咁抽水法，港星邊個肯制？所以台灣幫真係好抵食。
阮經天5萬
攬完E cup baby 後，FBI 問小天覺唔覺Baby 身材豐滿，小天笑笑口話：「我拱起身，沒有太貼近她的身體，所以感覺不到。」E cup baby 身材咁勁，小天就算「沒有太貼近」都好難感受唔到嗰份壓迫感。
高潮眼
要扮聖誕樹畀阮經天掛飾物上身嘅E cup baby ，用呢副高潮眼望實小天，睇嚟佢好「渴」。
阿婆照攬
小天估唔到連婆婆級都嚟支持佢，佢即時衝上前攬實婆婆，阿婆都唔放過，台星冧功真係唔講得笑。
抽逸臣水
響平安夜前一日，小天響宣傳新片《愛到底》嘅活動上，突然啜咗范逸臣耳仔一吓，連范逸臣都嚇一跳，事後佢好勉強咁向FBI 講：「這一下不錯，好溫暖。」FBI 就毛管戙囉！
模范七棒黑Girl 集體啜爆
模范七棒同黑Girl 加埋成15人，一齊響台灣飛嚟香港出席屯門市廣場嘅平安夜活動。雖然除番開，每人都袋唔夠1萬，仲要自己「扲」荷包買機票，但佢哋都一樣搏命。當日佢哋學《獎門人》嘴對嘴傳紫菜，男啜男、女啜女，fans 叫到拆天，咁識搞氣氛，真係抵到爛。
黑Girl8萬
棒仔加黑Girl 成棚人，引嚟六百幾個fans 捧場，當黑Girl 丫頭（左）同筱婕（右）玩嘴對嘴傳紫菜時，唔多顧儀態，又箍頸又大力啜，睇到台上嘅棒仔都咿嘩鬼叫。
模范七棒5萬 真啜
黑Girl 玩完到棒仔啜啜，本來靜晒嘅女粉絲開始起哄、尖叫。尤其野獸（左）同小祿（右）傳紫菜嗰陣，真係唔小心啜咗對方個嘴㗎！
作狀飲
其中一個遊戲要阿本（右二）、Apple （右一）同毛弟（左一）、小薰（左二）分成兩隊，互溝騎呢果汁畀對方飲，但經理人張世明猛擰頭提佢哋唔使真係飲，咁佢哋就皺晒眉頭作狀扮難飲。梗係啦，萬一飲病咗點搲銀呀！
