天后梅艷芳噚日逝世五周年，雖然落毛毛雨，但都冇影響歌迷一早就到省善真堂致祭，晚上就擺咗14圍齋宴同舉行悼念梅姐音樂會「今夜只因妳08」，梅姐生前摯友羅君左同梅艷芳國際歌迷會會長蘇小姐都有出現省善真堂。歌迷今年預備咗梅姐生前鍾意嘅糕點、乾炒牛河、素鮑素翅、點心等，仲有金銀珠寶、名牌手袋、燕窩等祭品，亦有日本、菲律賓歌迷送上花牌同聖誕禮物等。
歌迷會預備咗名牌手袋、金銀珠寶等紙紮祭品。
噚晚梅姐悼念活動上，有過百fans 重溫偶像嘅風采。
Fans 含淚悼偶像
羅君左帶埋撰寫嘅模擬版新書，畀梅姐過目。
羅君左之前出咗一本寫梅姐嘅書《不可能再遇上Anita-梅艷芳》，今年推出革新版，羅君左特別帶咗本模擬版畀梅姐先過目，佢話：「好似有阿梅幫手咁，本書已經推出第五版，不過個革新版封面版權上有問題，所以要押後兩星期先出。」佢又話革新版會有全新梅姐嘅相，包括從未曝光嘅觀音造型，收益則會改為捐去春蕾行動，幫助四川地震災童。晚上6點半，歌迷開始化寶同埋品嚐齋宴，蘇小姐話今年歌迷會正籌錢想以梅姐名義喺山區起學校，所以劉德華、張學友、鄭秀文、何韻詩就錄咗個呼籲片段，喺「今夜只因妳08」度播，有近150名fans 到場，現場播出梅姐生前片段同MV ，有啲fans 睇到偶像都忍唔住喊，羅君左就喺台上話仍然有咁多人支持阿梅，相信佢知道都會好安慰同驕傲。
由歌迷所送嘅粉紅摺紙玫瑰花上，用咗陳百強《深愛著你》歌詞來悼念梅姐。
from
http://appledaily.atnext. ... art_id=12032690
[
本帖最後由 young 於 2008-12-31 12:48 編輯 ]
