羅君左（斌仔）去年因糖尿病截去右腳，但他仍積極面對人生，惜大前日心臟病發昏迷不醒，延至前晚辭世，終年51歲。斌仔生前熱愛演藝工作，且樂善好施，遺願把保險金捐給好友梅艷芳成立的四海一心慈善基金會，這份無私的精神十分偉大。
生命鬥士羅君左過去十年積極抗病，先後患上腮大動脈瘤、腎炎、糖尿病等頑疾，去年更因先天性糖尿病惡化要切去右腳，但無損其鬥志，依然出力回饋社會，惜無情病魔前晚卻狠心帶走他。斌仔雖已逝，但他生前曾交託要把保險金捐給慈善機構，讓熱心公益精神延續。
斌仔去年截肢回復精神後即再投入演藝工作，還不怕辛苦抽空參與多個慈善活動，據知他生前曾向友人透露要把保險金捐給好友梅艷芳成立的「梅艷芳四海一心慈善基金會」。斌仔生前在友邦買下保險，記者昨日致電友邦保險高層連炎輝求證，他在電話中回應說：「係，斌仔係幫我買保險，至於保額係幾多，我唔方便透露客戶嘅資料。」問到連炎輝可曾聽過斌仔遺願是捐出保險金作慈善用途？他說：「佢有同我提過想捐畀四海一心同慈濟，好多細節仲要開會傾。」
前晚來遲一步到醫院送別斌仔的廖安麗，原來斌仔生前曾想託她代為處理私人財務，廖安麗昨日在電話直認說：「斌仔舊年接受截肢手術前，佢有同我提過幫佢處理私人財務，不過當時我都好多屋企事要處理（其夫葉青霖出家），我推咗佢，仲叫佢另安排人選。」
雖然沒替斌仔完成遺願，但廖安麗承諾會全面協助辦妥他的身後事，她說：「斌仔身邊冇直屬親友，所以我哋呢班朋友會全力搞好佢後事，為怕人多意見多，我哋開會傾咗會由斌仔好朋友阿Sin負責統籌，分配工作，我就隨時候命。」
廖安麗口中的阿Sin，其實是無綫前編劇廖先生，他與斌仔非常老友，近年不時照顧病榻中的斌仔，阿Sin昨日在電話中說：「據我哋了解，斌仔有兩個哥哥，一個親哥哥，但早年因為交通意外過咗身，佢呢個親哥哥已婚，斌仔有一個姪仔同一個姪女，而另一個哥哥係斌仔父母當年領養，冇血緣關係，噚晚呢個哥哥都有嚟醫院見斌仔最後一面。」
直至昨日阿Sin聯絡上聲稱是斌仔姪女的Cally，阿Sin說：「斌仔已經好耐冇同阿嫂同姪仔、姪女聯絡，但今日我接到一位Cally電話，佢話係斌仔姪女，喺我哋對話當中，佢（Cally）係講到啲相關資料出嚟，但係咪作實我就唔敢答。」斌仔友人一致推舉阿Sin做治喪委員會負責人，阿Sin表示今日會到政務署查詢有關以友人身份辦理斌仔身後事資料，他說：「我會去問吓可唔可以用朋友身份辦理死亡證，仲會問吓有關佢資產點處理嘅資料。」
記者昨日也聯絡上聲稱是斌仔姪女的Cally，她表示會全力協助辦理叔叔的身後事，Cally在電話中說：「我今日睇報紙知阿叔死咗，於是聯絡上廖先生（阿Sin），睇吓有乜嘢幫手，我哋會盡量將阿叔嘅後事搞得好好睇睇。」
對於斌仔猝逝，Cally說：「印象中嘅阿叔份人好活躍，做人又正面，但突然走咗，我哋都好意外，不過由於近年阿叔工作好忙，我哋好少聯絡，過時過節想約佢食餐飯都好難約，我都唔記得幾耐冇見過佢。」
from:
http://hk.apple.nextmedia.com/te ...462&art_id=14661611
