王力宏︰有錢乜都OK ！（設計對白）
蔡依林︰你仲貪過周杰倫！（設計對白）
王力宏甩底台中演出，Jolin 捱義氣執二攤補位上，兩場跨年騷淨袋72萬港元。
今個聖誕元旦，台星繼續發揮搶錢本能，分布中港台三地逢騷必唱，盡地一煲搵錢至上。
話明cash is king ，王力宏直頭見錢開眼，原本傾好晒出席台中市政府舉辦嘅跨年晚會，點知大陸開咪價更高，於是臨時放台中飛機，到深圳、上海唱足兩場跨年騷，袋100萬港元過肥年。
臨門脫腳，好在蔡依林抵得諗，一口答應做王力宏替工，執二攤救亡。贏咗袋錢，輸咗個「朵」，令王力宏變成貪錢「飛機王」。
今年八月，王力宏聯同韓國天王阿Rain 等人，擔任北京奧運閉幕禮嘉賓，更高歌《我愛北京》，努力鋪路搵「人仔」。（電視圖片）
連踩兩場
每年嘅十二月三十一日跨年騷，無論台北台中定台南，都會舉行盛大晚會迎接新一年來臨。
今年由台中市政府舉辦嘅跨年騷，會喺國立台灣體育大學體育館舉行，八大電視台負責籌備，搵嚟大班年輕偶像擔任嘉賓，分別有小豬羅志祥、楊丞琳、黑Girl （前名黑澀會美眉）、周杰倫新寵江語晨以及王力宏等。
價錢、檔期所有人一早傾好晒，負責喺倒數前出場同觀眾迎接2009年嘅王力宏，亦承諾收30萬港元酬勞現身。
點知喺今個月初，王力宏收到大堆國內跨年商演邀請，開價幾乎多成倍，錢無人會嫌多，為咗賺到盡，王力宏決定連踩兩場，出席深圳及上海兩個大型倒數晚會，淨袋100萬港元酬勞，大發新年財。
喺月中，以2,800萬港元轉會費加盟華納唱片嘅Jolin ，專登去北京水立方進行簽約儀式，蔡天后跨年騷筆歌酬，相比之下真係濕濕碎。
義氣天后
寧賺人仔棄搵台幣，王力宏經理人即刻向八大電視台提出辭演。
埋門一腳先話唔唱，負責跨年騷嘅製作人祝志傑收到壞消息之後，臨急臨忙搵人頂替，最後多得Jolin 蔡依林仗義相助，一口答應幫手收拾爛攤子。
剛剛喺北京水立方舉行完加盟華納唱片記者會嘅Jolin ，據聞轉會費高達2,800萬港元，要出動華納一姐唱倒數騷，價錢當然唔平得去邊，但最重要係，Jolin 早就答應出席桃園縣舉行嘅跨年騷，今次為咗「義氣」兩個字，唔介意趕場唱埋台中，製作人祝志傑感謝Jolin 嘅大恩大德之餘，不忘暗踩王力宏一腳：「很委屈！謝謝蔡依林大力幫忙。」
張惠妹
范逸臣
台星跨年陣容
每年跨年騷焦點，必定係台北站，但今年台星分散陣地演出，部分更連踩兩場，令每個跨年騷都能夠星光熠熠。
台北
地點：台北市政府前廣場
演出歌手：梁靜茹、蕭敬騰、蘇打綠等
倒數歌手：張惠妹、五月天
桃園縣
地點：桃園縣多功能藝文園區
演出歌手：五月天、柯有綸、南拳媽媽等
倒數歌手：蔡依林、梁靜茹、 范逸臣
台中
地點：國立台灣體育大學體育場
演出歌手：楊丞琳、江語晨、蔡依林等
倒數歌手：羅志祥
台南
地點：台南市政府西側廣場
演出歌手：周定緯、TANK 、潘裕文等
倒數歌手：S.H.E
高雄
地點：高雄夢時代廣場
演出歌手：范逸臣、伍佰、超偶幫等
倒數歌手：蘇打綠
張韶涵、吳克群分別會喺國內做跨年騷，講真句，佢哋喺台灣嘅知名度已經大不如前，唯有向祖國出發掘金。
唔認甩底
對於被指為錢放飛機，王力宏經理人許玉琴死撐話無件咁嘅事：「台中跨年晚會僅在接洽階段，並未確認，所以絕無『放鴿子』（放飛機）。」
不認不認，但之後許玉琴就忍唔住口大讚王力宏喺國內炙手可熱，更加係台灣史上第一位歌手有「非士」連踩兩場大陸跨年騷，講到尾，咪又係錢作怪。
其實唔止王力宏一個鍾意賺「人仔」，全中國多個跨年晚會，都發現台星
跡，包括早前因為票房唔理想，臨時取消演唱會嘅吳克群，出席中央電視台舉行嘅跨年騷，穩袋45萬港元酬勞；喺大陸知名度比台灣更強嘅張韶涵，只係去上海唱幾首歌，就有70萬港元落袋，相對留喺台灣本土開咪價，足足賺多一倍有多。
阮經天上個月推出嘅處男寫真集《ALOHA 阮經天正在夏威夷》，大賣半裸肌肉，據聞銷量高達5萬，加埋月底出街嘅新劇《敗犬女王》再谷一谷人氣，外界一致睇好會成為阮經天另一個事業高峰期。（阮經天寫真集圖片）
（阮經天寫真集圖片）
封街籌款
其實唔係個個台星都咁市儈，正如今個聖誕，佢哋輪住嚟香港開騷、搞簽名會，部分人分文不收，尤其係S.H.E ，三女24日平安夜，喺廣東道封街舉行嘅《S.H.E 廣東道聖誕倒數Street Party 》，雖然入場費要收100蚊，但全數會撥捐去香港血癌基金，純為做善事賣唱，仲搵嚟台灣幫林宥嘉做嘉賓，香港代表就有黃貫中打頭陣出場。
至於舊年都有嚟香港陪歌迷過聖誕嘅棒棒堂同黑Girl ，今年再接再厲，據聞更因應市況，減價襲港，棒棒堂六子收番去年5萬港元開心價做倒數騷，黑Girl 則比去年減價2萬，以8萬優惠價出席屯門市廣場舉行嘅平安夜倒數派對。
S.H.E 來港連踩三個騷之餘，仲會出席新城勁爆頒獎禮，全為宣傳分文不收，好在有份唱台南倒數晚會搵真銀，歌酬接近30萬港元。
港女嗒糖
一系列台星活動之中，最令港女瘋狂肯定係阮經天喺平安夜舉行嘅聖誕抱抱會。
自從憑《命中注定我愛你》一炮而紅，阮經天嘅人氣一直有增冇減，更成為港女嗒糖新偶像。
據聞收20萬港元酬勞任由投懷送抱嘅阮經天，喺各大地鐵站已經大賣今次抱抱會廣告，佢張大頭相，離九呎遠都見到，我仲目擊到一名傻癡癡嘅港女，揸住部電話影低張poster ，阮經天嘅魅力，唔使多講。
飛輪海
台星襲港時間表
去年市道暢旺，聖誕元旦期間成為台星搲銀大好良機，雖則經濟市況今時唔同往日，但台風照樣正面吹襲本港，陣容比去年更鼎盛。
