賭王三太細女何超蓮最近同初戀男友散咗，但以佢條件，有樣有身材，要搵人補位，絕對冇難度，但原來十七歲超蓮對成熟型兼渾身肌肉嘅體操王子楊威，一樣嗒糖。
話說上個禮拜六（二十日），喺澳門運動場舉行嘅「慶祝澳門特別行政區成立9周年 齊運動 萬人體藝大匯演」音樂會，嘉賓之一嘅楊威一上到台，受歡迎程度拍得住同場演出嘅鄭秀文、容祖兒。
有份嚟趁熱鬧嘅何超蓮，著上低胸短裙等機會同楊威影合照，何家千金，當然成功埋身。不過啱啱喺上個月初響海南三亞迎娶女友楊雲嘅楊威，對新老婆簡直一條心，台上台下經常行孖咇，即使面對嫩口少女超蓮，體操國寶亦坐懷不亂。證明楊威唔似倪震，未患上中年危機。
低胸玉腿打孖上，何超蓮索爆全場，但楊威依然目不斜視，一碌木咁望住鏡頭影相，莫非超蓮魅力，遠不及楊太。
東亞一姐Sammi 近排頻頻亮相工作，載歌載舞完畢，即刻返入後台問飛輪海嗱簽名CD ，原來係送俾佢啱啱做完心臟手術嘅姨甥女，佢仲話入行咁多年，第一次同明星嗱簽名，尷尬到面都紅埋。
