周星馳之前接咗套荷李活電影《青蜂俠》（The Green Hornet ），部戲由佢自導自演，雖然搞得七七八八，後來有傳星爺對劇本有啲意見，最後喺傾唔掂嘅情況下，星爺決定劈炮，主動放棄執導套戲。
度唔掂檔期
《青蜂俠》編劇兼男主角薛夫洛根無緣同星爺合作，非常可惜。資料圖片
消息傳出後，外國同內地傳媒及網站都有報道件事，仲話如果《青蜂俠》冇咗星爺執導筒，會對套戲嘅期望程度大打折扣。估唔到今次星爺劈炮令電影公司陣腳大亂，之前哥倫比亞電影公司專程派人嚟香港見星爺，希望佢回心轉意重執導筒，之後又每日一電同每日一電郵，實行以誠意打動星爺。其實星爺今次堅持劈炮唔做導演，除咗劇本問題，檔期都係主要問題，據知佢喺兩個禮拜前正式向哥倫比亞電影公司請辭，唔再執導套戲，其實星爺都覺得好可惜，但左計右計後，檔期都係度唔掂，事關佢一早應承咗同搞笑演員積比力克（Jack Black ）合作開部搞笑時裝超人片。至於會唔會繼續演《青蜂俠》，就要睇吓檔期配唔配合到先決定。馮仁昭打電話畀星爺問番成件事，講到哥倫比亞咁有誠意，佢會唔會回心轉意？星爺話：「其實唔係劇本問題，劇本都未出，又點知好唔好，但我而家唔考慮拍《青蜂俠》，我會全力拍部超人片，如果我做《青蜂俠》導演，我自己開嘅超人片就要押後兩年先開得，我覺得過咗兩年又未必係拍超人片嘅好時機，況且我始終想拍番原創嘅念頭。」星爺係個有長遠計劃嘅人，畀佢精打細算過都冇走雞！
周星馳因為檔期問題，自動劈炮唔撈，拒為《青蜂俠》執導筒。資料圖片
