致力加入潮界嘅余文樂，近排成日同郭富城、I.T 老闆沈嘉偉同張智霖（Chilam ）呢三劍俠埋堆。雖然論身家地位，樂仔同城城、沈嘉偉仲差幾班，但為咗提高身份，都要買番部靚車襯班富貴朋友，近日佢一擲112萬買入黑色C63型號嘅平治新車代步。
余文樂前晚駕駛配以「LV 」字頭車牌嘅新Benz 去跑馬地，弊在違例泊車。
打邊爐滾到
嘅城城著短袖衫，登上佢部林寶堅尼戰車。
齊齊違例泊車
前晚樂仔、城城相約一男一女友人食飯，地點又係城城飯堂、位於跑馬地嘅「愉記」。一年四季都鍾意打邊爐滾滾吓嘅城城，呢晚同樂仔齊齊滾，大家仲滾得好有派頭。城城駕駛套上靚絕車牌「K1NG 」、價值348萬嘅林寶堅尼跑車，樂仔亦唔輸蝕，駕駛配上「LV 」英文字頭、落地不足三周嘅新Benz 到場，不過佢哋違例泊車，將座駕隨意停泊食肆外，懶理隨時被抄牌。一行四人喺店內大滾特滾，樂仔喺10點半先行離開，在場記者問佢係咪買咗新車，佢就黑面拒答，再問佢係咪以海嘯價購入？佢即時「倔」咗記者一眼，粒聲唔出上車鬆人。20分鐘後，著短袖T 恤嘅城城步出食肆，問佢聖誕節有冇假放？佢只係「哼」咗一聲，然後披番件皮褸載同友人離開。話時話，樂仔今年6月被發現購入150萬元嘅黑色寶馬M5房車，當時佢掛LV 車牌，但呢個車牌前晚已經套咗喺佢架新平治度，而沈嘉偉同Chilam 之前已分別買咗同型號嘅車，睇嚟樂仔有心同佢哋睇齊。
余文樂打邊爐都要擺架子，對記者黑面兼唔瞅唔睬。
