應采兒同陳小春自從年初被發現拍拖之後，兩個人都好大方咁承認戀情，雖然當時外界似乎都唔多睇好呢段感情，但係應采兒同小春反而越嚟越恩愛，兩個人成日都被人影到煙韌拍拖，十足連體嬰咁，睇得多都眼冤。前日應采兒喺杭州出席主演嘅內地劇《鳳穿牡丹》宣傳，做緊訪問過陣，佢係咁催啲記者快啲做訪問，問吓佢做乜嘢事咁趕啦，原來佢話趕住搭飛機見小春喎！見佢哋鬼咁癡纏，就問佢幾時好事近？佢就好大方咁承認小春係佢理想對象，應采兒仲老實不客氣咁話：「兩年他不求婚就硬嫁他！」睇嚟小春都走唔甩應采兒嘅五指山啦！
小春同應采兒公開拍拖初期外界都唔係咁睇好，但點知兩人越來越恩愛。 資料圖片
應采兒同李小冉（左）一齊做訪問時竟然催記者快啲，因為趕住坐飛機見男友喎。 《網易娛樂》圖片
讚性格可愛
近來唔少圈中人被人發現偷食，問到應采兒如果發現小春背叛自己會點算呢？會唔會採取乜嘢行動？應采兒話：「我唔會報復，亦都唔會去爭，我覺得如果兩個人相愛要互相尊重，如果呢點都做唔到仲講乜嘢喺一齊。」應采兒話佢同小春都係好勝嘅人，佢話小春雖然外表好壞，但私底下小春好錫女朋友，仲話佢性格好可愛添，果然係情人眼里出西施。
應采兒早前出席完導演馬偉豪嘅婚宴，唔知係咪咁加速佢有一顆恨嫁的心呢？ 資料圖片
