在無線新劇《飛女正傳》中，要飛天遁地又要打扮性感的女超人蔡少芬昨日試造型，她以大deep V 連身裙配粗腰帶展示好身材，又向同劇男演員陳豪、曹永廉及黃德斌頻頻放電。B Cup 朱慧敏擔心身材未能配合劇中大胸OL 角色被飛，考慮隆胸，認真搏命。
蔡少芬、陳豪、曹永廉、黃德斌及朱慧敏等昨日在將軍澳電視城為新劇《飛女正傳》試造型，在劇中奉旨賣弄性感的蔡少芬，穿著deep V 裙顯示她的真材實料，她說：「係，真材實料，突然咁sexy ，好難度高，係為咗呢部劇犧牲，一向保守嘅我，要挺胸收腹，又要飛天遁地，仲要帶住呢個body ，我又唔可以畀自己走光，一時又要變成肥婆，有一個大躉，我未試過，劇入面我一個人要做兩個角色，兩個性格極端嘅人，對於我來講係第一次，真係好難做。」陳豪則以一頭白髮新造型示人，本來是扮李察基爾，但是看上去卻似金管局總裁任志剛，陳豪說：「我係加州州長，由細到大好多人話我似佢（阿諾舒華辛力加）。」陳豪於劇中飾演整容醫生，問他對女性的美貌有沒有特別要求？他說：「最緊要係健康膚色，面色紅卜卜就算係肥瘦都冇問題，男人唔係睇肥瘦，最緊要有冇氣色。」
蔡少芬雖然已經結婚但依然性感拋胸，更自讚真材實料。
朱慧敏笑言為了配合劇集角色，一度考慮隆胸上陣。
朱慧敏想隆胸
陳豪以全新造型拍攝新劇，他希望和蔡少芬能擦出新火花。
此外，朱慧敏被委派飾演大胸OL 的角色，可惜她有心無力，她說：「要做個大胸女人，好似Ada （蔡少芬）咁，要有條深溝，今日搞咗成個鐘都唔成功，而家成身黐晒膠紙，透唔到氣，咁我本來係model 身形，好難B 整到G Cup 。」朱慧敏曾經想過為了新劇去隆胸，她說：「我聽到監製話搞唔掂易角，我有認真諗過去隆胸，我都問過醫生，佢話隆完係要抖兩個星期，咁我而家又開緊其他劇，所以唔得，我都好驚會易角。」採訪、攝影：楊潔雯
黃德斌、陳豪同曹永廉合力抱起蔡少芬，她即擺出風騷甫士。
