我跳得高，收視自然高啦！（設計對白）
蔡少芬響舺板咬牙切齒咁搏命跳高，肉緊程度勁過一眾猛男黃德斌同林保怡。
《珠光寶氣》播映以來收視一般，雖然企穩29點，可惜一直未破到30大關。上周五（28日）多位演員浩浩蕩蕩出海造勢，由於三大女主角只得蔡少芬（Ada ）在場，佢就惟有孭起宣傳重任，一早已出口術話如果套劇收視到40點，就即刻生仔。
當日氣溫僅13度，一上到船，Ada 已經自動波剝咗件羽絨，以背心連身褲晒肉，又黐實「劇中老公」岳華，擺出唔少恩愛畫面搶鋒頭；咁都未算，之後Ada 企響舺板跳到鬼死咁高，雙手握拳現晒手筋，連林保怡都唔夠佢揮呀！睇佢natural high 咁肉緊，為咗套劇真係博到盡。
夫婦合璧
Ada 全程黐住岳華，不惜戙起隻腳擺型爆甫士，保怡都忍唔住向佢哋瞄一瞄！
陳豪有市
至於著住件迷彩褸嘅陳豪，成日扭扭擰擰，想除又唔除咁，依然有大班師奶fans 「嬲」到實，師奶殺手果然唔睇得小。
