無線製作資源部總監樂易玲和鄭嘉穎被傳過從甚密已經多年，但兩人從不避嫌。05年出席《翡翠歌星賀台慶》時，鄭嘉穎主動搭著樂易玲合照，樂易玲亦相當受落。
在金融海嘯影響下，去年賺五億的電視王國無線，本周一（12月1日）裁員212名員工，大部分來自方逸華愛將樂易玲旗下的製作資源部。原來，掌管六個部門的樂易玲，亦遭削權，削剩兩個。
據知，今次樂易玲被削權是董事方逸華的旨意，全因近年樂易玲偏袒鄭嘉穎，因而疏忽不少歌手及藝員的續約問題，搞到要陳志雲、曾勵珍和何麗全等高層出手補鑊。難怪上周四（11月27日）晚，陳志雲出席無線長期服務頒獎禮，被問到樂易玲被削權一事時，陳總直認不諱，更拉埋曾勵珍接受本刊訪問。
上周四（11月27日）晚，無線總經理陳志雲出席無線長期服務頒獎禮時，大方主動回應樂易玲被削權一事。
02年，樂易玲空降到無線製作資源部出任助理總監，多年來恃住是六叔邵逸夫太座方逸華愛將關係，一直權傾朝野，就算總經理陳志雲以及其他高層明知樂易玲工作上有疏忽，亦冇人敢出聲。今年1月，樂易玲正式升正為製作資源部總監，理應管轄範圍更多，但本刊收到可靠消息，指她未來管理的部門，會由現在的六個縮減為兩個。
管轄部門6變2
藝員科 保留
梳頭、化妝、服裝部 保留
廠務部 被削（正在物色接手人選）
TVB 周刊 被削（由該雜誌出版人余銘接管）
音樂組 被削（暫時由各節目監製分擔工作）
平面設計組 被削（交由節目部品牌宣傳科負責）
上周四（11月27日）無線長期服務頒獎禮上，齊被樂易玲連累要幫手「補鑊」的陳志雲、曾勵珍（左）和何麗全（右），顯得份外好傾。
公開認嗒鄭嘉穎糖
今次樂易玲被削權，只因她近年袒護鄭嘉穎太著跡，令不少高層睇唔過眼，不停向方逸華打毒針。據知情人士說：「佢淨係掛住錫鄭嘉穎，大家早就隻眼開隻眼閉，但最近真係做得太核突。好似吳君如《嘩！嘩！嘩！打到嚟》訪問佢，問佢對邊個男藝員嗒糖，佢夠膽開名話係鄭嘉穎，完全冇顧及自己嘅身份。最近鄭嘉穎、佘詩曼同周麗淇單三角緋聞，佢唔俾周麗淇個助手入台，其他高層亦睇唔過眼，梗係會同方小姐反映啦！」
除了令公司形象受損外，樂易玲最大鑊莫過於顧住照顧「親生仔」鄭嘉穎，而疏忽跟楊千嬅及陳奕迅等大卡士歌手，以及郭晉安和馬浚偉等藝員傾續約問題，最後要由其他高層包括陳志雲、曾勵珍和何麗全分擔其職務，例如郭晉安由陳志雲傾，楊千嬅由何麗全傾。
據知情人士表示，方逸華收到太多有關樂易玲失職的投訴，在迫不得意之下進行削權行動，「方小姐早前開會時，都俾樂易玲好落台，只係話佢管藝員部已經太多嘢要兼顧，照顧唔到咁多，所以其他四個佢管開嘅部門要搵人幫手跟。其實以往佢呢個位都係管咁多嘢㗎啦，咁咪即係無形中削佢權囉！」
樂易玲和鄭嘉穎在人前不避嫌外，私底下亦經常約會，06年3月就被本刊影到一同到旺角嘆「毓民私房牛肉麵」。
06年8月，無線收費台為鄭嘉穎舉行《鄭重聲明音樂會》，樂易玲出面力撐，還情不自禁攬實鄭嘉穎，企圖向「親生仔」索吻。
偏袒鄭嘉穎
爭住交人
樂易玲知道即將被削權後，剛巧遇上金融海嘯，公司下令每個部門「交人」，明知有四個部門「就嚟唔關自己事」，她當然樂意出手，「佢（樂易玲）直情超額完成，所以製作資源部成為咗裁員嘅重災區囉！佢仲要係最早交裁員名單嘅高層添！」知情人士說。
上月11日，樂易玲出席無線節目巡禮時，記者就削權一事向她了解，她表現抗拒只回應：「咩傳聞嚟㗎？我唔同你講！」上周四（11月27日）晚無線舉行長期服務頒獎禮，記者就樂易玲被削權一事向無線總經理陳志雲求證。
記：有冇聽過最近樂小姐俾人削權？管嘅部門由六個減至兩個？
陳：（笑笑口）係呀！公司會不停重整架構，因應性質同管理效率作出唔同嘅調配。製作資源係個好大嘅部門，所以會分配出來俾其他人幫手處理。
記：但係以往樂小姐呢個職位，都係管理咁多嘢喎？
陳：無錯，所以要檢討係咪可以做得更好。
記：佢被削權係咪因為照顧鄭嘉穎而疏忽咗某啲歌星同藝員
續約問題？
陳：大家互相幫助！咁邊個熟啲咪邊個幫手囉！
上月11日，樂易玲出席無線節目巡禮時，記者上前問她是否因偏袒鄭嘉穎而疏於其他職務，導至被削權，她即表現緊張，並指是記者作料。
上月11日，鄭嘉穎出席無線節目巡禮時，一貫黑面態度回應樂易玲被削權一事。
今年9月鄭嘉穎被傳與佘詩曼撻著，狠飛周麗淇，之後更被人爆料指他與佘詩曼在八號風球夜會，雖然令形象受損，但樂易玲仍對他處處維護。
有傳跟樂易玲和鄭嘉穎不和的王喜，早前提前跟無線解除經理人約，改簽楊紫瓊旗下的經理人公司，有說是因為樂易玲偏心鄭嘉穎所致。
陳志雲回應完記者後，與有份補鑊的製作部（戲劇）總監曾勵珍傾談了一會，之後陳志雲竟主動向本刊記者招手，示意曾勵珍亦有回應。曾勵珍說：「馬浚偉係我傾返嚟，唔好話邊個幫邊個，簽咗返嚟我自己都有份用嘛！藝員係公司重要資源，我唔係幫佢（樂易玲），我係幫公司啫！」同樣有出手的製作部（非戲劇）總監何麗全亦承認曾與楊千嬅傾續約，「唔可以話係補鑊嘅，因為好多時我哋同歌手嘅接觸比較多，所以好多時會由我哋出面幫手傾。」
連累樂易玲被削權的「親生仔」鄭嘉穎，上月11日出席無線節目巡禮時，就表示全不知情，「冇聽聞過喎！（原因係因為佢掛住照顧你，所以疏忽咗其他工作？）都唔知咩消息來源，傳聞嘅嘢我唔會再特別回應。」樂易玲被削職，愛將鄭嘉穎亦被傳來年工作量大減，佢兩個都算同病相憐咯！
藝員．歌星約滿唔理
根據無線的不明文規定，對於一些當紅及資深的藝員及歌星，都會在約滿前一年甚至更早，由樂易玲負責傾續約的條件。不過，因為樂易玲近年掛住照顧鄭嘉穎，導致傾約工作轉嫁到陳志雲、曾勵珍及何麗全身上。
曾勵珍代傾
明年7月約滿的馬浚偉：「曾姐（曾勵珍）嘅意見我好尊重，不過份約嘅細節就唔講啦！」
陳志雲代傾
還有年多約滿的郭晉安：「之前個約都係由陳生（陳志雲）同我傾！」
何麗全代傾
據知，年前楊千嬅與無線的歌星合約期滿，也是由何麗全出面傾。楊千嬅：「當時所有嘢都係交俾經理人公司去傾。」
何麗全代傾
早前陳奕迅歌星約滿，樂易玲遲遲未有派人與他傾續約，據知最後要由何麗全出面，不過陳奕迅不肯作正面回應。
夏雨
楊思琦
郭政鴻
胡定欣
蕭正楠
藝員講裁員
無線本周一（12月1日）正式宣布裁員212人，雖然全部是幕後工作人員，藝員表面好似無咩影響，實則公司已下令跟藝員續約要凍薪，身為前線的藝員又有咩睇法呢？
夏雨：「士氣點都有啲影響，傾約要凍薪都冇辦法。搵錢主要係喺出面，我唔擔心嘅。」但他不肯回應是否已簽經理人合約。
楊思琦：「聽到個心都唔安樂，有啲識得嘅幕後都接到大信封。我份合約兩個月之前簽嘅，好彩價錢有調整到。」
郭政鴻：「今日開工都覺得愁雲慘霧，惟有希望佢哋快啲搵到工，自己份約啱啱喺海嘯之前續咗，條件都合理。」
胡定欣：「都會好唔捨得被裁嘅同事，希望公司好景可以請番佢哋。凍薪都合理嘅，但自己份約未到期，到時先算啦！」
蕭正楠：「人手真係精簡咗，我哋拍嘢都要幫手嗱吓嘢，但唔會話世界末日，好快會過去。」
