無線一向肥水不流別人田，有筍嘢一定畀自己友，好似《勁歌金曲》咁，前晚喺將軍澳電視城錄影，由無線「親生女」鍾嘉欣主唱嘅《其實我不快樂》成為今期冠軍歌，無線為咗努力掘金，放晒啲藝員去唱歌，好似黃宗澤、林峯、胡杏兒、王祖藍咁，藝員多啲瓣數有助公司吸金。不過喺本年度《勁歌》頒獎禮所頒嘅獎，一定搞到無線頭都大埋，咁多仔女唔知分得畀邊個。馮仁昭睇準鍾嘉欣坐定粒六有獎，鍾嘉欣自己都笑笑口咁話：「真係要多謝公司，今次係我第一次上冠軍歌，我都有信心㗎，唱片公司花咗好多心機落去，令我好感動，明年我會拍劇同唱片一齊做，我唔怕辛苦。」另外，前晚嘉賓仲有鄧麗欣（Stephy ）同古巨基，Stephy 大唱佢首新歌《中華冷麵》，佢嘅打扮包得好鬼密實，反而伴舞嘅女舞蹈員，就身材勁爆又火辣，搞到Stephy 俾人搶晒鏡，又難得佢唔介意，佢話：「我冇佢哋咁好身材，佢哋勁過我咁多，我著少啲布就唔識跳舞，dancers 就慣咗，所以唔好比拼。」
鄧麗欣密實裝拼火辣女dancers ，自言先天身材不足不宜暴露。
古巨基噚日喺灣仔出席活動，佢就寸新城獎多，不會出現分不勻嘅情況。
古巨基寸新城
此外，古巨基噚日又出席喺灣仔舉行嘅慈善活動，講番佢間唱片公司金牌大風同新城反面，因為基仔啲獎輸咗畀陳奕迅喎，所以唱片公司拉隊唔到，基仔話：「我有聽人講過，不過我未有時間問公司，如果公司真係缺席，我自己會跟大隊。但係據我所知我過日真係有工作在身，目前咁嘅環境賺錢首選啦。」至於有指新城阿頭朱明銳話同金牌大風合作意見分歧，默認同獎項有關，基仔力撐公司寸新城咁話：「新城嘅獎項有百幾個，根本唔存在勻與唔勻嘅問題，就算連一啲重要嘅獎項都有好多，所以我覺得同獎項無關。」
鍾嘉欣前晚喺《勁歌》節目度獻唱佢首冠軍歌。
