擁有36D 勁爆上圍嘅趙碩之，日前被雜誌大字標題指佢同無線製作部總監何麗全秘密交往一年，話趙碩之陪已婚嘅何麗全去長洲，其實當日趙碩之同經理人Angus 一齊出席何麗全媽咪壽宴，當日何麗全太太、亦即係吳家樂個家姐都有出現。趙碩之噚日喺灣仔出席漫畫《黃玉郎醉拳》記者會，將會成為漫畫其中一位女主角嘅佢，以一身噴血cosplay 打扮出現。對於同何麗全傳緋聞，趙碩之解釋話：「經理人同何麗全係好朋友，佢每年都有去何老太嘅壽宴，今年見我咁岩有時間，就帶埋我去，我全程都同經理人一齊，何太（何麗全太太）坐喺我身邊，我唔想大家有乜誤會，何生同我哋同枱都係盡禮儀啫。」
趙碩之一身噴血cosplay 打扮谷胸耍醉拳。
何麗全無端端被擺上枱，同趙碩之傳緋聞。資料圖片
怕影響形象
趙碩之又話：「我覺得唔好意思，怕失實嘅報道會影響何生嘅家人。」趙碩之話冇打電話畀何生了解，佢經理人見到報道已經第一時間致電同何生溝通，至於怕唔怕畀人話靠黐高層博上位，趙碩之話絕對唔係事實，亦唔擔心影響日後同無線合作，只係怕影響佢同何生嘅形象。趙碩之話自己只係入行4、5個月，拍《四葉草》都未識何生，又何來交往一年？報道指趙碩之忽然富貴，佢話自己屋企不嬲都住喺比華利山，之前有靚車接送，只係朋友嘅司機嚟啫。至於何麗全方面就一直未有回覆。
趙碩之收到黃玉郎親繪嘅肖像畫，話真係畫得好似喎！
