敷衍綵排
只係負責臨尾出場唱隻歌的呂方，有高佢成個頭的國內女星伴舞，只見綵排時呂方極度敷衍，同女伴簡直係零交流。久休復出的呂方，頸上三截肥肉，睇嚟都要減一減。
自10月爆出與拍拖16年的嘟嘟鄭裕玲分手後，呂方一直迴避傳媒，除搬離與嘟嘟同居多年的淺水灣道Manhattan Tower 寓所，租住面積約500呎，位於紅磡海韻軒的服務式住所外，就連嘟嘟所贈的寶馬房車，亦交託朋友駛回嘟嘟的寓所停車場。
回復單身的呂方，一切由零開始。11月17日，呂方到上海為東方衛視的《舞林大會》做表演嘉賓，據知騷價約收3萬，作為分手後復出第一炮。但在國內人氣已經麻麻的呂方，唔單止全程黑面兼敷衍了事，更因為拒絕國內傳媒訪問而遭抨擊。睇嚟嘆咗咁多年嘅呂方，心態上仍未ready 要自食其力，好弊喎！
好似我咁識做人先襟撈嘛！（設計對白）
甩拖後的呂方，曾表示未來的日子會專注事業發展，並把目標鎖定在內地市場。復出第一炮是為11月17日到上海為東方衛視的《舞林大會》做壓軸嘉賓，不過唱的仍是23年前的舊歌《老情歌》，以前接騷冇5萬酬勞都唔接嘅呂方，據知今次只收約3萬人民幣，而香港的一線歌手在國內接騷平均收10萬人民幣以上。
臨時取消專訪
為怕被傳媒追問有關與嘟嘟的分手內情，呂方事先與電視台講明，不接受有關感情問題的訪問。心情唔多靚全程木口木面的呂方連綵排都拒絕拍照，更在錄影前把自己困在化妝間內，此舉早已令在場的國內傳媒不滿。至於多個一早約定的傳媒專訪以及網上媒體的訪問，亦臨時全部取消。
避得過國內傳媒，呂方卻避唔過大會司儀，國內傳媒群起委託大會司儀曹可凡在台上對他窮追猛打，曹可凡當眾問呂方現時唱《老情歌》這首老歌，相對於十幾年前，應該會有很多新的體會，呂方心知不妙先是一愕然後說：「我是一個很念舊、很長情的人，所以一直喜歡唱舊歌。」曹可凡再說：「娛樂圈有兩種人，一種像劉德華這樣拚命工作，另一種像你比較喜歡玩，過悠閒生活。」呂方即搶住反駁：「我只是在享受生活，我喜歡和朋友聊天，喝喝酒，做點小菜。」曹可凡順勢將話題扯向嘟嘟，「你女朋友喜歡吃你做的菜嗎？」呂方即時變臉，現場充滿火藥味，呂方更炮轟曹可凡說：「我以為上台只是唱首歌，怎知道會問這麼多問題啊！」
落台後的呂方塊面黑上加黑，未待節目錄影完全結束，便率先離開去食消夜。國內傳媒一早守在呂方離開電視台的必經之路，希望能堵截他進行訪問，但呂方在一眾助手擋駕下成功入𨋢，直頭當在等候的傳媒透明。事後眾國內傳媒均認為呂方復出扮大牌，對他黑面唔合作非常不滿。
大會司儀曹可凡（右）突然殺呂方一個措手不及，問及感情事，夾在中間有份參加《舞林大會》的李彩華都愕咗然。
呂方被大會司儀曹可凡辣興後，即場扯火發老脾，擰轉面行開，由曹可凡打圓場。
提女友即扯火
黑面避記者
事先同大會講明唔講感情事的呂方，被大會司儀問到一肚氣，落台後即拉大隊走人，點知成班國內傳媒堵塞必經之路。呂方在幾位助手擋駕下避記者入𨋢，當時佢塊面仲係好黑。
呂方與助手等人去到浦西巨鹿路一間大閘蟹小店，唔好以為明星一定著數，呂方都要扯住煙排隊等位。
呢間大閘蟹店唔係咩高級食府，賣的大閘蟹都係幾十蚊有找，呂方坐低冇幾耐，有份參加《舞林大會》嘅吳啟華前女友金巧巧亦到場。
成晚心情唔多好的呂方，見到靚女金巧巧話都唔多句，全程唔係煲煙就係玩自閉。
食平價食大閘蟹
呂方口口聲聲話簽咗丘亞葵做經理人，打算再在娛樂圈大展拳腳，點知丘亞葵話細節仲未傾好，亦即係未有復出大計。
未有工作落實
本刊記者就此事聯絡呂方現時的經理人丘亞葵，對於呂方今次與內地傳媒關係搞得很僵，丘亞葵說：「其實佢（呂方）接呢單嘢我係唔知，應該係佢以前接落，我公司冇人跟上去。（呂方響節目上發火喎？）我都係睇報紙先知。（咁佢有咩復出大計?）暫時未有進一步嘅進展。早個幾月佢原意打算主要攻國內，我要再搵時間同佢傾傾先，再幫佢落實工作。」
